Konkan Railway: गणेश भक्तांच्या सोयीसाठी कोकण रेल्वेची खास रो-रो सुविधा; जाणून घ्या संपूर्ण माहिती

गणेशोत्सवात मुंबईतून कोकणात जाणाऱ्याची संख्या खूप असते. वाढत्या प्रवासी संख्येमुळे रस्त्यावर मोठी ट़्राफिक होत असते. त्यादरम्यान रेल्वेतही मोठी गर्दी असते. अनेकवेळा भाविकांना रेल्वेचं तिकीट मिळत नाही. आगामी गणेशोत्सवासाठी कोकण रेल्वेनं खास सुविधा सुरू केलीय. कोकणात जाणाऱ्या गणेश भक्तांच्या सोयीसाठी कोकण रेल्वेने कार रोरो सेवा सुरू केली आहे.

कार ट्रेनवर लोड करून कोकणात पोचविल्या जाणार आहेत. कारबरोबर परिवारातील ३ व्यक्तींना त्याच ट्रेन मधून गावाकडे जाता येणार आहे. कोकण रेल्वेने पहिल्यांदाच कार रोरो सेवा सुरू केली आहे. यामुळे गणेशोत्सवात कोकणात जाताना होणाऱ्या वाहतूक कोंडीतून आणि खराब रस्त्यापासून गणेशभक्तांची सुटका होणार आहे.

२३ ॲागस्ट ते ११ सप्टेंबरपर्यंत ही कार रोरो सेवा सुरू असेल. रोहा येथील कोल्हाड रेल्वे स्थानकात कार ट्रेनवर चढविल्या जातील. यानंतर त्या गोवा येथील वेरणा रेल्वे स्थानकावर खाली उतरल्या जातील. सायंकाळी ५ वाजता सुटणारी ट्रेन पहाटे ५ वाजता पोचणार आहे. एका कारसाठी ७ हजार ८०० रूपये खर्च येणार आहे.

दरम्यान मुंबई ते रत्नागिरी दरम्यान रो-रो सेवा लवकरच सुरू होणार असल्याची माहिती राज्याचे बंदरे विकास मंत्री नितेश राणे यांनी दिली होती. “रो-रो सेवा सुरू करण्यासाठी अंतिम टप्प्यातील चर्चा सुरू असून, गणेशोत्सवाच्या आधी ही सेवा सुरू करण्याचे प्रयत्न सुरू आहेत.”या सेवेमुळे मुंबईकरांना गर्दीपासून मुक्त आणि जलद प्रवासाचा अनुभव घेता येईल, असं नितेश राणे यांनी सांगितले होतं.

गणेशोत्सवाच्या काळात कोकणात जाणाऱ्या मुंबईकरांची प्रचंड गर्दी होते. त्यामुळे महामार्गांवरील वाहतूक कोंडी आणि प्रवासातील वेळ यामुळे नागरिक त्रस्त होत असतात. अशावेळी जलमार्ग हा एक पर्यायी आणि सुलभ मार्ग ठरू शकतो.