Jalgaon Pune Flight Service : जळगाव- पुणे विमानसेवा होणार सुरू; तिकीट बुकिंग झाली सुरु

जळगाव : जळगावला विमानराळ झाल्यानंतर आतापर्यंत मुंबईसाठी उड्डाण झाले होते. मात्र ही विमानसेवा देखील काही कारणात्सव खंडित झाली. शिवाय पुणे, अहमदाबादसाठी विमान सेवा सुरु करण्याचे प्रयत्न सुरु होते. यानंतर आता जळगाव ते पुणे या विमानसेवेची अखेर येत्या आठवड्यात ट्रायल फ्लाइट उड्डाण भरणार आहे. यामुळे पुणे जाणाऱ्यांसाठी सोयीचे होणार आहे. 

सात वर्षांपूर्वी जळगावातून व्यावसायिक विमान सेवेला सुरुवात झाली होती. उद्घाटनाच्या वेळी जळगावातून (Jalgaon) पुण्यासाठी विमानसेवा सुरु करण्याबाबत तत्कालिन कंपनीने घोषणा केली होती. जळगाव विमानतळावरून सेवा पुरवणाऱ्या कंपनीने शुक्रवारी या अतिरिक्त व प्रायोगिक तत्वावरील विमानसेवेची अधिकृत घोषणा केली आहे. त्यानुसार जळगावातून २४ व २५ मे रोजी ट्रायल फ्लाइट उड्डाण घेतील. (Flight) विमानसेवा पुरवणाऱ्या 'फ्लाय ९१' या कंपनीने २४ मे रोजी या ट्रायल फ्लाइटचे नियोजन केले.

दोन्ही दिवशी दुपारी २ वाजून १० मिनिटांनी पुण्यासाठी फ्लाइट उड्डाण भरेल ते पुण्यात ३ वाजून २५ मिनिटांनी लैंड होईल. तर अर्ध्या तासाने ही फ्लाइट परतीसाठी पुण्यातून ३ वाजून ५५ मिनिटांनी उड्डाण भरून जळगावात ५ वाजून २० मिनिटांनी लँड होईल. यासाठी आतापासून तिकीट विक्री सुरु केली आहे. अर्थात पुणे (Pune) जाणाऱ्यांसाठी अवघ्या तासाभराचा हा विमान प्रवास राहणार असल्याचे येणाऱ्या जाणाऱ्यांसाठी विमानसेवा सोयीची ठरणार आहे.