नशिराबादला पहिला झेंडा कोणाचा..नगर परिषदेवर असणार १७ नगरसेवक

जळगाव : येथून जवळच असलेल्या नशिराबाद ग्रामपंचायतीचे रूपांतर नगर परिषदेत झाले आहे. या नगर परिषदेत २०११ च्या जनगणनेनुसार २६ हजार लोकसंख्या आहे. यामुळे १७ नगरसेवक असतील. त्यात ज्यांचे नगरसेवक अधिक निवडून येतील, त्या पक्षाचा नगराध्यक्ष असेल. यामुळे या नगर परिषदेत आपल्याच पक्षाची सत्ता यावी यासाठी शिवसेना, राष्ट्रवादी, भाजप या तिन्ही पक्षांनी निवडणुकीच्या अनुषंगाने तयारी सुरू केली आहे. (jalgaon-news-first-flag-for-Nasirabad-17-councilors-will-be-on-the-Municipal-Council)

शिवसेनेचे पालकमंत्री गुलाबराव पाटील यांनी तर शिवसेनेचा भगवा नशिराबाद नगर परिषदेवर फडकवूच, असा विश्‍वासही नुकत्याच झालेल्या सभेत व्यक्त केला आहे. नशिराबाद नगर परिषदेवर सध्या प्रशासक म्हणून तहसीलदार नामदेवराव पाटील यांची निवड करण्यात आली. ते सध्या नशिराबादचा कारभार पाहत आहेत.

अशी असेल पदांची रचना

नव्याने स्थापन होणाऱ्या नगर परिषदेत लिपिक टंकलेखक, स्वच्छता निरीक्षक, गाळणी चालक/प्रयोगशाळा सहाय्यक, पंप ऑपरेटर (वीजतंत्री), तारतंत्री, वायरमन, मुकादम व्हॉल्व्हमन ही पदे निर्माण होतील. सोबतच ब श्रेणीतील तीन पदे, क श्रेणीतील बारा पदे अशी एकूण १५ पदे नव्याने निर्माण केली जातील.

अभियंता स्थापत्य, अभियंता विद्युत, अभियंता संगणक, जलदाय, मलनिस्सारण व स्वच्छता, लेखापाल व लेखापरीक्षक, कर निर्धारक, नगररचनाकार व अग्निशमन सेवा अशी पदे मंजूर आहेत. हा पदाचा आकृतिबंध शासनाकडे पाठविला आहे. लवकरच त्यावर निर्णय होणार आहे.