ऑरेंज अलर्ट.. रात्रीपासून धुळ्यात मुसळधार पावसाला सुरुवात

धुळे : हवामान विभागातर्फे उत्तर महाराष्ट्रात ऑरेंज अलर्ट देण्यात आला आहे. त्‍यानुसार रात्रीपासून धुळे जिल्ह्यातील विविध ठिकाणी पावसाला सुरुवात झाली आहे. आज सकाळपासून देखील मुसळधार पाऊस सुरू आहे. (dhule-news-uttar-maharashtra-orange-alert-and-dhule-late-night-heavy-rain-droped)

खानदेशात मागील दीड ते दोन महिन्यांपासून दडी मारलेली होती. दीड महिन्‍याच्‍या विश्रांतीनंतर पावसाने जिल्ह्यातील शिंदखेडा, साक्री त्याचबरोबर शिरपूर तालुक्यांमध्ये दमदार हजेरी लावली आहे. धुळे शहरासह तालुक्यात देखील रात्रीपासून जोरदार पावसाने हजेरी लावली असून सकाळपासून देखील ढगाळ वातावरणासह रिमझिम तर कधी जोरदार पाऊस सुरू आहे.

पावसामुळे आशा पल्‍लवीत

ऑगस्ट महिना निम्म्याहून अधिक उलटला असला तरी देखील धुळे जिल्ह्यामध्ये अद्यापही समाधानकारक पाऊस झालेला नाही. यामुळे प्रकल्पांमधील पाणी पातळी खालावली आहे. रात्रीपासून जिल्ह्यामधील विविध ठिकाणी सुरू असलेल्या जोरदार पावसामुळे जिल्ह्यातील प्रकल्पांमधील पाणी पातळी वाढण्यास मदत होणार असल्यामुळे धुळेकरांना या पावसामुळे दिलासा मिळण्याची शक्यता आहे.