Samruddhi Mahamarg: समृद्धी महामार्गावर वीज निर्मिती; देशातील पहिला प्रयोग; किती मेगावॅटची होणार निर्मिती, जाणून घ्या

नागपूर-मुंबईला जोडणारा हिंदु ह्रदयसम्राट बाळासाहेब ठाकरे महाराष्ट्र समृद्धी महामार्ग ७०१ किमी लांबीचा आहे. या महामार्गावरून आतापर्यंत सव्वा दोन कोटीहून अधिक वाहनांनी प्रवास केलाय. महामार्गावर वीज निर्मिती होणार आहे. बुलढाणा येथील कांरजालाड आणि वाशिम जिल्ह्यातील मेहकर इंटरचेंज येथील सौरऊर्जा प्रकल्प उभारण्यात आलाय. हा प्रकल्प आता कार्यान्वित झालाय.

सौरऊर्जा निर्मितीमुळे समृद्धी महामार्ग देशातील पहिलाच पथदर्शी प्रकल्प ठरलाय. पहिल्या टप्प्यात समृद्धी महामार्गावरील बुलढाण्यातील तालुका कांरजालाड व वाशिममधील तालुका मेहकर, येथे सौरऊर्जा प्रकल्प उभारण्यात आलाय. या प्रकल्पाची क्षमता ९ मेगावॅट असून त्यापैकी कांरजालाड येथील ३ मेगावॅट व मेहकर येथील प्रकल्पातून २ मेगावॅट वीज निर्मितीस सोमवारी प्रारंभ झालाय. त्यामुळे महामार्गावर सौर ऊर्जेच्या निर्मित्ती प्रकल्पाला आता गती मिळणार आहे.

समृद्धी महामार्गाच्या आखणीपासूनच वेगवान प्रवासाबरोबर सौरऊर्जा निर्मितीचे उद्दिष्ट महामंडळाने आखलं होतं. समृद्धी महामार्गाच्या इंटरचेंजवर २०४ मेगावॅट क्षमतेच्या सौरऊर्जा प्रकल्प कार्यान्वित करण्याचा आराखडा निश्चित करण्यात आला होता. सौरऊर्जा निमितीच्या माध्यमातून महामंडळाला पथकराव्यतिरिक्त उत्पन्नाचा नवीन स्त्रोत उपलब्ध झालाय.

महाराष्ट्र राज्य रस्ते विकास महामंडळांची विशेष उद्देश वाहन कंपनी महासमृद्धी रिन्युएब्ल एनर्जी लि. व महावितरण यांच्या दरम्यान सन २०२२ मध्ये झालेला करारान्वये या विजेची विक्री करण्यात येणार आहे. मुख्यमंत्री सौरकृषी वाहिनी योजने अंतर्गत निविदा प्रक्रियेत भाग घेत महामंडळाने प्रति युनिट रु. ३.०५ पैसे दर दिला होता.