Maharashtra Rain: राज्यात इतका धुव्वाधार पाऊस पडतोय कसा? पुढील 4 दिवस महाराष्ट्रासाठी धोक्याचे!

राज्यभरात धुव्वाधार पाऊस पडत असून अनेक जिल्ह्यातील नद्यांना पूर आलाय. मुसळधार पावसामुळे मुंबईचे जनजीवन विस्कळीत झालंय. महाराष्ट्रातील अर्ध्या जिल्ह्यांमध्ये पुढील ३ दिवसांसाठी रेड आणि ऑरेंज अलर्ट जारी करण्यात आलाय. प्रशासनाकडून बाहेर न पडण्याचे आवाहन केले जातंय. अशातच महाराष्ट्राचे मुख्यमंत्री देवेंद्र फडणवीस यांनी शेजारील राज्यांशी संपर्क साधलाय.

नांदेडमध्ये खूप पाऊस पडलाय, तेथे ढगफुटीसारखी परिस्थिती निर्माण झालीय. एनडीआरएफ आणि लष्कराच्या तुकड्या तिथे पोहोचल्या आहेत. राज्यातील धरणांमधील पाण्याचा विसर्ग करावा लागला तर तेलंगणा आणि कर्नाटक राज्यात दयनीय स्थिती निर्माण होऊ शकते. त्यामुळे मुख्यमंत्री फडणवीस शेजारील राज्यांच्या मुख्यमंत्र्यांच्या संपर्कात आहेत. पण, विश्रांतीनंतर अचानक इतका पाऊस का पडतोय? असा प्रश्न केला जातोय.

महाराष्ट्रात इतका पाऊस का पडतोय?

महाराष्ट्राच्या वेगवेगळ्या भागात जोरदार पाऊस सुरूय. काही भागांमध्ये पूर परिस्थिती उद्भवली आहे. महाराष्ट्रात वेगवेगळ्या भागात पाऊस पडण्याचे कारण म्हणजे पश्चिम बंगालच्या उपसागरात निर्माण झालेला कमी दाबाचा पट्टा. कमी दाबाचे क्षेत्र तीव्र होऊन डिप्रेशन झाल्यामुळे पावसाचा जोर वाढलाय. त्याचबरोबर मान्सूनही सक्रिय झालाय. पूर्व-पश्चिम अशी द्रोणीय परिस्थिती निर्माण झाल्यामुळे कोकण ते उत्तर केरळपर्यंतच्या किनारपट्टी भागात अतिमुसळधार पाऊस होतोय.

पुढील काही दिवस महाराष्ट्रातील अनेक भागात पावसाचा जोर कायम राहणार आहे. मुंबईसह ठाणे, पालघर आणि रायगड जिल्ह्याला हवामान विभागाने 19 ऑगस्टसाठी रेड अलर्ट जारी केलाय. तर रत्नागिरी आणि सिंधुदुर्गला ऑरेंज अलर्ट जारी केलाय. नाशिक, पुणे आणि साताऱ्याच्या घाट परिसरासाठी देखील रेड अलर्ट देण्यात आलाय. यासह उत्तर महाराष्ट्रातील सर्व पाचही जिल्ह्यांना हवामान विभागाने यलो अलर्ट जारी केलाय. तसेच छत्रपती संभाजीनगर, जालना, परभणी, हिंगोली, नांदेड, लातूर आणि बीड या सातही जिल्ह्यांना यलो अलर्ट देण्यात आलाय.