Maharashtra Rain Update : छत्रपती संभाजीनगर आणि अमरावतीत ढगफुटी; अनेकांचे संसार रस्त्यावर, बळीराजाच्या डोळ्यातही अश्रू,VIDEO

माधव सावरगावे, अमर घटारे/ छत्रपती संभाजीनगर, अमरावती

राज्यातील काही जिल्ह्यांत पावसाने हाहाकार केला आहे. छत्रपती संभाजीनगर आणि अमरावतीच्या चांदूरबाजार तालुक्यात ढगफुटी सदृश्य पाऊस पाहायला मिळत आहे. मुसळधार पावसाने सगळीकडे पाणीच पाणी झालंय. मुसळधार पावसामुळे एनडीआरएफची टीम नागरिकांच्या मदतीला धावून गेली आहे.

छत्रपती संभाजीनगरात पावसाचा हाहाकार

छत्रपती संभाजीनगर तालुक्यात ढगफुटी सुदृश्य पावसाने काही क्षणात हाहाकार केला आहे. मुसळधार पावसाने सगळीकडे पाणीच पाणी झाल्याचे दिसत आहे.

करमाड, छत्रपती संभजीनगर तालुक्यातील आज दुपारी तीन वाजेच्या दरम्यान ढगफुटी सदृश्य पाऊस झाला. यामुळे कूबेर गेवराई, बनगाव, जयपुर, वरझडी परिसरात झालेल्या पावसाने लाहूकी नदीला मोठा पूर आला. या पूराचे पाणी कूबेर गेवराई,बनगाव येथील अनेक घरात शिरल्याने नुकसान झाले. जोरदार पावसामुळे काही ठिकाणी शेती खरडून पिकांचे मोठे नुकसान झालं आहे.

अमरावतीतही ढगफुटी सदृश्य पाऊस

अमरावतीच्या चांदूरबाजार तालुक्यात ढगफुटी सदृश्य पाऊस झाल्याने सगळीकडे पाणीच पाणी पाहायला मिळालं. चांदूरबाजारच्या माधान गावात अनेक घरात पाणी शिरल्याने गावात एनडीआरएफची टीम दाखल झाली. एनडीआरएफची टीम बचाव कार्यासाठी तातडीने दाखल झाली. ढगफुटी सदृश्य पावसाने माधान गावातील अनेक घर जमीनदोस्त झाली आहेत. अनेक घरात मोठ्या प्रमाणात पाणी शिरल्याने गृपयोगी साहित्य आणि अन्न धान्याचे मोठे नुकसान झाले आहेत.

रस्ता म्हणायचा की ओढा?

संभाजीनगर - जळगाव राष्ट्रीय महामार्गावर पावसाच्या पाण्याचा ओढा झाल्याचे दिसत आहे. छत्रपती संभाजीनगर-जळगाव राष्ट्रीय महामार्गावर पुरसारखी स्थिती झाली आहे. महामार्गाला नदीचं स्वरूप आलं आहे. तर अजिंठा लेणीकडून येणाऱ्या देशी-विदेशी पर्यटकांची वाहने काही तास अडकली होती. त्यामुळे संभाजीनगरजवळील चौकाजवळ डोंगरातून रस्ता तयार करण्यात आला. पावसाचे पाणी ओढ्यासारखे रस्त्यावर आल्यानं रस्त्याच्या कामाचीही पोलखोल झाली आहे.

सोलापूरच्या बार्शीतही पावसाची दमदार हजेरी

सोलापूरच्या बार्शी तालुक्यातही सलग दुसऱ्या दिवशी पावसाची दमदार हजेरी पाहायला मिळाली. या पावसामुळे चांदणी नदीला पूर आला. सोलापूरच्या बार्शी तालुक्यातील आगळगाव उंबरगे गावांना जोडणारा पूल पाण्याखाली गेला आहे. मुसळधार पावसामुळे उंबरगे, भानसळे,खडकोनी, कळंबवाडी गावाचा संपर्क तुटला आहे. अनेक भागात पाऊस झाल्यामुळे शेतात पाणीच पाणी झालंय. चांदणी नदीला आलेल्या पुरामुळे नदी-नाले, ओढे तुडुंब भरून वाहू लागली आहेत.