Crime: समृद्धी महामार्गावर गोळीबाराचा थरार, मित्राला बंदूक दाखवताना गोळी सुटली अन्...; घटनेचा थरारक CCTV

समृद्धी महामार्गावर गोळीबाराची भयंकर घटना घडली. मित्राला बंदूक दाखवताना गोळी सुटली आणि थेट तरुणाच्या कमरेला लागली. या घटनेत गंभीर जखमी झालेला तरुणाला उपचारासाठी रुग्णालयात दाखल करण्यात आले आहे. या घटनेमुळे एकच खळबळ उडाली आहे. समृद्धी महामार्गावरील टोलनाक्यावर ही घटना घडली. हा गोळीबाराचा थरार सीसीटीव्ही कॅमेऱ्यामध्ये कैद झाला आहे.

मिळालेल्या माहितीनुसार, संभाजीनगरमध्ये समृद्धी महामार्गावरील सावंगी टोल नाक्यावर शुक्रवारी रात्री गोळीबाराची घटना घडली. या ठिकाणी काम करणारा तरुण आपल्या मित्राला त्याच्याकडे असलेले पिस्तूल दाखवत होता. हे पिस्तूल कसे चालतात हे दाखवत असताना अचानक पिस्तूलमधून गोळी सुटली आणि ती या तरुणाच्या मित्राला लागली. कमरेला गोळी लागल्यामुळे तरुण गंभीर जखमी झाला.

भरत घाटगे असं गंभीर जखमी झालेल्या तरुणाचे नाव आहे. तर पिस्तूल दाखवताना गोळी सुटलेला तरुण करण भालेराव आहे. घटनेनंतर करण पिस्तूल घेऊन फरार झाला. हा गोळीबाराचा प्रकार मध्यरात्री घडला. त्यानंतर पोलिसांनी घटनास्थळी धाव घेत जखमीला ताबडतोब रुग्णालयात दाखल केली. पहाटे अडीचच्या सुमारास या प्रकरणी पोलिसांनी करणविरोधात गुन्हा दाखल केला. पोलिस आरोपीचा शोध घेत आहेत.

पोलिसांनी दिलेल्या माहितीनुसार, समृद्धी महामार्गावरील सावंगी परिसरामध्ये टोल क्रमांक १६ वर भरत घाटगे आणि करण भालेराव हे दोघे कर्मचारी ड्युटीवर होते. आलेल्या वाहनांना पास करण्याची जबाबदारी त्यांच्यावर होती. ड्युटीवर रूममध्ये असताना करणकडे असलेले पिस्टूल कसे चालते हे जाणून घेण्याचे कुतुहूल भरतला होते. यावेळी करण पिस्तूल कसे चालते हे भरतला दाखवत होता. त्याचवेळी पिस्तूलमधून गोळी सुटली आणि थेट भरतच्या कमरेला लागली.

सुदैवाने गोळी कंबर आणि पोटाच्या मध्ये घुसल्याने पोटातील आतड्यांना इजा झाली नाही. तर पिस्टल सोबत बाळगणारा करण भालेराव हा फरार झाला. सदरील घटनेची माहिती मिळाल्यानंतर पोलिसांनी घटनास्थळी धाव घेतली. भरत घाटगे याला छत्रपती संभाजीनगर येथील घाटी रुग्णालयात दाखल करण्यात आले. करणवर शस्त्रक्रिया करून गोळी बाहेर काढण्यात आली आहे. या घटनेप्रकरणी करणविरोधात गुन्हा दाखल करण्यात आला असून पोलिस त्याचा शोध घेत आहेत.