Kolhapur Theft Video : कोल्हापूरमध्ये एसटी बसमधून लाखांचे 95 लाखांचे सोने चोरीला, घटना CCTV कॅमेऱ्यात कैद

रंजित माजगावकर, साम टीव्ही, प्रतिनिधी

कोल्हापुरहून पुण्याकडे निघालेल्या एका होलसेल दागिने विक्रेत्याची लाखो रुपयांचे दागिने असलेली बॅग अज्ञात चोरट्यांनी लंपास केल्याची घटना घडली आहे. याबाबत शाहूपुरी पोलिसांत अज्ञात चोरट्यांविरूध्द चोरीचा गुन्हा दाखल करण्यात आला आहे तसेच मध्यवर्ती बस स्थानक परिसरातील सीसीटीव्हीच्या आधारे पोलीस चोरट्यांचा शोध घेत आहेत.

मिळालेल्या माहितीनुसार, संपूर्ण घटना कोल्हापुरातील मध्यवर्ती बस (Bus)स्थानक इथे रविवारी ता.३० जून रोजी घडली आहे. मुंबई वडाळा इथले होलसेल सोन्या-चांदीचे दागिने विक्री करणारे सुरजितसिंह चौहान हे विक्रेते २८ जुन तारखेला मुंबईहून कोल्हापूरकडे निघाले होते. सुरजितसिंह यांनी परत येताना पुण्यात थांबून दोन दिवस काही सराफांना नवीन दागिन्यांची माहिती दिली. रविवारी सकाळी ते कोल्हापुरात आले. कोल्हापुरात त्यांनी गुजरी येथील काही सराफ व्यवसायिकांना आपल्याकडील दागिने दाखवले.

यानंतर सायंकाळी ते कोल्हापूरहून (Kolhapur )पुण्याकडे निघाले होते. सायंकाळी साडेसहाच्या सुमारास ते कोल्हापुरातील मध्यवर्ती बस स्थानकातून शिवनेरी बसमधून पुण्याकडे जाण्यासाठी निघाले. यावेळी एसटीच्या रॅकमध्ये ठेवलेली ९५ लाख ६९ रुपये किमतीचे दागिने असलेली बॅग अज्ञातांनी लंपास केली.

याप्रकरणी सुरजित सिंह चौहान यांनी दिलेल्या फिर्यादीवरून शाहूपुरी पोलिसात गुन्हा दाखल करण्यात आला. शाहूपुरी पोलीससाचे पथक अज्ञात चोरांचा शोध घेत आहे. पोलिसांनी मध्यवर्ती बस स्थानक(station)परिसरातील सर्व सीसीटीव्हीची पाहणी केली असता यामध्ये दोन अज्ञात चोरटे सुरजीतसिंह चौहान यांची बॅग लंपास करून घेऊन जात असतानाच निदर्शनास आले आहे.