तटकरे-चाकणकर बिझनेस पार्टनर, खरात प्रकरणात ठाकरेंच्या शिलेदारांचा खळबळजनक दावा, वाचा नेमकं काय म्हणाल्या?

खरात फाईल्स समोर आल्यानंतर रुपाली चाकणकरांच्या अडचणी वाढल्या आहेत... त्यातच रुपाली चाकणकर आणि सुनील तटकरेंनी अघोरी कृत्यासाठी अनामिका कापल्याचा आरोप अंधारेंनी केला होता.. या आरोपानंतर आता अंधारेंनी तटकरे आणि चाकणकर बिझनेस पार्टनर असल्याचा आरोप केलाय... यावरचा हा स्पेशल रिपोर्ट...

महिलांना वासनेची शिकार बनवणाऱ्या भोंदू खरातचे पाय धुतल्याप्रकरणी राजीनामा द्यावा लागलेल्या रुपाली चाकणकरांच्या अडचणी काही कमी व्हायचं नाव घेत नाहीत... चाकणकरांनी महिला आयोगाचा राजीनामा दिल्यानंतर सुषमा अंधारेंनी आपला मोर्चा चाकणकरांसोबत तटकरेंकडे वळवलाय.. सुषमा अंधारेंनी गणिताच्या सुत्राचा दाखला देत सुनील तटकरे आणि रुपाली चाकणकरांचे पती निलेश चाकणकर हे बिझनेस पार्टनर असून त्यांची 450 कोटींची भागिदारी असल्याचा आरोप केलाय...

हा गौप्यस्फोट करताना अंधारेंनी दीपक केसरकर यांनाही घेरलंय.. दीपक केसरकर शालेय शिक्षणमंत्री असताना सिन्नरच्या एमआयडीसीचा आणि त्यांचा काय संबंध? असा सवाल उपस्थित करतानाच अंधारेंनी केसरकर, चाकणकर आणि खरातच्या फोटोंचा अल्बमच दाखवलाय.. एवढंच नाही तर खरात, केसरकर आणि चाकणकरांच्या कॉल रेकॉर्ड आणि आर्थिक व्यवहारांची तपासणी करण्याची मागणी केलीय..

खरं तर खरातच्या काळ्या जादूचे अनेक किस्से चर्चिले जात आहेत... चाकणकर आणि तटकरेंनी अनामिका कापून अघोरी कृत्य केल्याचा आरोप अंधारेंनी केला होता... आता पुन्हा एकदा अंधारेंनी चाकणकर आणि तटकरे यांच्यात व्यावसायिक भागिदारी असल्याचा आरोप केल्यानं चाकणकरांसोबत तटकरे आणि दीपक केसरकरांचंही टेन्शन वाढलंय... त्यामुळे अंधारेंच्या मागणीप्रमाणे एसआयटी चाकणकरांना अटक करुन खरात प्रकरणाचा आणखी सखोल तपास करणार का? याकडे राज्याचं लक्ष लागलंय..

अभिजीत सोनवणे, साम टीव्ही न्यूज...नाशिक