अखेर अकलूज ग्रामपंचायतीचे रूपांतर नगर परिषदेमध्ये

अकलूज : आशिया खंडातील सर्वात मोठी ग्रामपंचायत असलेल्या अकलूज ग्रामपंचायतीसह माळेवाडी ग्रामपंचायतीचे नगरपरिषदे मध्ये रूपांतर करावे या मागणीसाठी अकलूजकरांनी राज्य सरकारच्या विरोधात दोन महिन्यांपासून उपोषण सुरू केले होते. त्यानंतर आज राज्य सरकारने ग्रामस्थांच्या उपोषणाची दखल घेत अकलूज माळेवाडी ग्रामपंचायतीचे नगरपरिषदमध्ये रूपांतर करण्यात आले आहे. तसा अध्यादेश ही राज्य सरकारने आज पारित केला आहे.

हे देखील पहा -

अकलूज नगरपरिषदेवर माळशिरस तहसीलदारांची प्रशासक म्हणून नियुक्ती केली आहे. राज्यात भाजप-सेनेचे सरकार असताना भाजप आमदार रणजितसिंह मोहिते-पाटील यांनी अकलूज माळेवाडी, नातेपुते, श्रीपुर-महाळुंग या ग्रामपंचायतींचे नगर परिषद व नगरपंचायती मध्ये रूपांतर करावे असे ठराव शासनाकडे दिले होता. त्यानुसार तत्कालीन मुख्यमंत्री देवेंद्र फडणवीस यांनी या ग्रामपंचायतींचे नगर परिषदेमध्ये रूपांतर करण्यास मान्यता दिली होती.

दरम्यान राज्यात महाविकास आघाडीचे सरकार आल्यानंतर अकलूज माळेवाडी, नातेपुते ग्रामपंचायतीचा प्रस्ताव शासन दरबारी रखडला होता. राज्यातील अन्य ग्रामपंचायतींचे नगरपरिषद मध्ये रूपांतर करण्यास सरकारने परवानगी दिली. मात्र, अकलूज माळेवाडी चा प्रस्ताव रखडला होता. यातूनच येथील ग्रामस्थांनी या मागणीसाठी सरकार विरोधात आंदोलनाचे हत्यार उपसले होते. सलग दोन महिने हे आंदोलन सुरू होते. आज या आंदोलनाला यश आले आहे.

Edited By : Krushnarav Sathe