Tukaram Mundhe : तुकाराम मुंढेंच्या रडारवर राज्यातील अंगणवाड्या, आता तरी मुलांना पौष्टीक आहार मिळणार?

सुप्रीम मस्कर, साम टीव्ही

अंगणवाड्यांमध्ये मुलांना पौष्टिक आहार मिळावा यासाठी आता तुकाराम मुंढे सज्ज झालेत. FDAच्या रडारवर आता अंगणवाड्या आहेत, तर गणेशोत्सवातला महाप्रसादावरही FDAची नजर आहे. निकृष्ट पोषण आहारावर एका अंगणवाडी सेविकेनं सवाल उपस्थित केल्यानंतर आता अंगणवाड्या अन्न व औषध प्रशासन आयुक्त तुकाराम मुंढेंच्या रडारवर आलेत. FDAनं अंगणवाड्यामध्ये दिल्या जाणाऱ्या शालेय पोषण आहाराकडे आणि तिथल्या स्वच्छतेकडे आपलं लक्ष वळवलयं.

निकृष्ट दर्जाचे जेवण, भुंगे लागलेली कडधान्ये, खिचडीत आळ्या आढळणे आणि अन्नातील प्रचंड अस्वच्छता यांसारख्या गंभीर तक्रारींची दखल घेत एफडीने राज्यभर मोठ्या मोहिमेचा इशारा दिलाय. FDA आता दर महिन्याला राज्यातील अंगणवाड्यांमध्ये तपासणी मोहिम राबवणार आहे. जेणेकरून लहान मुलांच्या आरोग्याशी खेळण्याचा कुठलाच प्रकार घडणार नाही.

तर दुसरीकडे आगामी गणेशोत्सवाच्या पार्श्वभूमीवर सार्वजनिक मंडळांकडून आयोजित केल्या जाणाऱ्या महाप्रसाद आणि भंडाऱ्याच्या आयोजनावरही एफडीएची नजर राहणार आहे. यापुढे FDAच्या परवानगीशिवाय महाप्रसाद आयोजित करणं मंडळांना महागात पडू शकतं.

मुळात महाप्रसादामुळे किंवा सामुहिक अन्न दानावेळी अन्नातून विषबाधेसारख्या दुर्दैवी घटना रोखण्यासाठी स्वच्छतेचा निकष पाळला जावा हाच यामागील मुख्य उद्देश आहे.. मात्र यामुळे नियम मोडून अन्नवाटप करणाऱ्यांचे धाबे चांगलेच दणाणलेत. असं असलं तरी आता तुकाराम मुंढेंच्या मोहिमेमुळे मुलांना कागदावरचा नव्हे तर प्रत्यक्षात पौष्टीक आहार मिळण्याची आशा बाळगायला हरकत नाही.