Social Media Account Ban : सोशल मीडियातून समाजात तेढ निर्माण करणाऱ्यांवर कारवाईचा बडगा; धुळ्यात तिघांवर गुन्हा

सोशल मीडियावर आक्षेपार्ह आणि वादग्रस्त पोस्ट व्हायरल करून समाजात तेढ निर्माण करण्याच्या प्रकरणात धुळे पोलिसांनी मोठी कारवाई केली आहे. तीन सोशल मीडिया अकाउंट धारकांविरोधात गुन्हे दाखल करण्यात आले असून, या कारवाईमुळे जिल्ह्यात खळबळ उडाली आहे.

पुण्यातील यवत मध्ये काही दिवसांपूर्वी सोशल मीडियावरील एका वादग्रस्त पोस्टवरून मोठा तणाव निर्माण झाला होता. या घटनेने कायदा व सुव्यवस्थेचा प्रश्न उभा राहताच राज्यभरातील पोलीस यंत्रणा सतर्क झाली आहे. त्याच पार्श्वभूमीवर धुळे जिल्ह्यातील सायबर शाखेने सोशल मीडियावर सतत नजर ठेवत तपास सुरू केला होता.

तपासादरम्यान तीन वेगवेगळ्या अकाउंटवरून काही गुन्हेगारी पार्श्वभूमी असलेल्या व्यक्तींचे व्हिडिओ अपलोड करण्यात आल्याचे निष्पन्न झाले. हे व्हिडिओ समाजात भय व तणाव पसरवण्याचा उद्देश ठेवून पोस्ट करण्यात आल्याचे स्पष्ट झाल्यानंतर पोलिसांनी तत्काळ कारवाई करत संबंधित तिन्ही अकाउंट धारकांविरोधात गुन्हे दाखल केले.

या कारवाईची दखल स्वतः जिल्हा पोलीस अधीक्षक श्रीकांत धीवरे यांनी घेतली असून, त्यांच्या आदेशानुसार तात्काळ गुन्हे नोंदवण्यात आले. पोलिसांकडून या प्रकाराला दुजोरा देत सांगण्यात आले की, समाजात जातीय तेढ, हिंसाचार किंवा सार्वजनिक शांततेला धोका पोहोचवणाऱ्या कोणत्याही प्रकारच्या पोस्ट्सवर पोलिसांची करडी नजर आहे आणि दोषींवर कठोर कारवाई करण्यात येईल. या प्रकारामुळे सोशल मीडिया वापरणाऱ्यांमध्ये खळबळ उडाली आहे. नागरिकांनी जबाबदारीने सोशल मीडिया वापरावा, असे आवाहन पोलिसांनी पुन्हा एकदा केले आहे.