Dhule Crime: लग्नसोहळ्यात चाकूने वार करत तिघांची निर्घृण हत्या, गुजरात बॉर्डरवरून ३ जणांना अटक; नेमकं काय घडलं?

Summary -

• पिंपळनेर येथे लग्नसोहळ्यात धारदार शस्त्राने हल्ला

• ८ जणांवर चाकूने सपासप वार करण्यात आले

• या घटनेत ३ जणांचा जागीच मृत्यू झाला तर ५ जण गंभीर जखमी झाले

• गुजरात बॉर्डरवरून ३ आरोपींना अटक करण्यात आली

धुळ्याच्या पिंपळनेर येथे लग्नसोहळ्यात रक्तरंजित थरार घडला. लग्नसोहळ्यात ८ जणांवर चाकूने सपासप वार करण्यात आले. या हल्ल्यात ३ जणांचा जागीच मृत्यू झाला. तर ५ जण गंभीर जखमी झाले आहेत. यामधील तिघांची प्रकृती चिंताजनक आहे. याप्रकरणी पोलिसांनी मोठी कारवाई केली आहे. ३ हल्लेखोरांना अटक करण्यात पोलिसांना यश आले आहे. इतर फरार आरोपींचा पोलिस शोध घेत आहेत.

पिंपळनेर वऱ्हाडी हत्या प्रकरणानंतर पिंपळनेर पोलिस अॅक्शन मोडमध्ये आल्याचे पाहायला मिळात आहे. लग्न मंडपात झालेल्या राड्यानंतर ३ जणांची धारदार शास्त्राने हत्या करून पसार होणाऱ्या ३ आरोपींच्या पिंपळनेर पोलिसांनी मुसक्या आवळल्या आहेत. या तिघांनी लग्न मंडपात तीन वऱ्हाडींची हत्या करून घटनास्थळावरून पोबारा केला होता. पिंपळनेर पोलिसांनी गुजरात बॉर्डर घाटामध्ये स्थानिकांच्या मदतीने ट्राफिक जाम करून या तिन्ही मारेकऱ्यांच्या मुसक्या आवळल्या आहेत.

पोलिस अधिकाऱ्यांनी घटनास्थळी रात्री उशिरा भेट देऊन या संपूर्ण परिस्थितीची माहिती जाणून घेतली आहे आणि या ३ मारेकऱ्यांच्या विरोधात पिंपळनेर पोलिस ठाण्यात गुन्हा दाखल केला आहे. उर्वरित सर्व आरोपींना लवकरात लवकर गजाआड केले जाईल असा विश्वास पोलिस अधिकाऱ्यांनी दिला आहे. या हत्याकांडाच्या घडेमुळे धुळे हादरले आहे. पोलिस सध्या या प्रकरणाचा कसून तपास करत आहेत.

घडलं असं की, धुळे येथील पिंपळनेर येथे नीलकंठ नगरात गोसावी समाजाच्या लग्नसोहळ्यात ही घटना घडली आहे. साखरपुड्याची तयारी सुरू असताना साक्री आणि सोनगड येथून आलेल्या नातेवाईकांमध्ये आधीपासूनचा वाद होता. तसेच साखरपुड्यापूर्वी काही नातेवाईकांनी व्हॉट्सअॅपवर आक्षेपार्ह संदेश आणि व्हिडिओ शेअर केल्याने तणाव वाढला होता. त्या वादातूनच लग्नसोहळ्यात अचानक संतापलेल्या काही जणांनी धारदार शस्त्राने ८ जणांवर हल्ला केला. यामध्ये तिघांचा मृत्यू झाला. तर ५ जणांवर रुग्णालयात उपचार सुरू आहेत.