मुलाला काही झालं तर आम्ही आत्महत्या करु, लेकाची मृत्यूशी झुंज, आई-बापाचा आक्रोश, प्रेम संबंधातून पोराला मारहाण

धाराशिव : प्रेम प्रकरणातून अमानुष पद्धतीने मारहाण झालेल्या धाराशिव येथील तरुणाची सध्या मृत्यूची झुंज सुरु आहे. मारहाण झाल्यापासून तरुण शुद्धीवर नसल्याची माहिती आई-वडिलांनी दिली आहे. सोलापुरातील खासगी रुग्णालयात एक आठवड्यापासून त्याच्यावर उपचार सुरु होते. एकुलत्या एका मुलाचं काही बरं वाईट झालं तर आम्ही आत्महत्या करु, असं म्हणत आई-वडिलांनी आक्रोश केला आहे. आरोपींना तात्काळ अटक करत फाशीची शिक्षा देण्याची मागणीही त्यांनी केली आहे. माऊली गिरी असं या तरुणाचं नाव आहे.

धाराशिव जिल्ह्यातील भूम इथे १८ वर्षीय तरुणाला लोखंडी रॉड, काठीने अमानुष पद्धतीने मारहाण करण्यात आली होती. मारहाणीनंतर तरुणाला मृत समजून भूम तालुक्यातील पांढरेवाडी शिवारात विवस्त्र अवस्थेत फेकून देण्यात आलं होतं. सात ते आठ जणांच्या टोळक्याकडून मारहाण करण्यात आली होती. पाठीपासून तळपायापर्यंत बेदम मारहाण करण्यात आली होती. गुप्तांगालाही तीक्ष्ण वस्तूने इजा केल्याची माहिती देण्यात आली आहे. तरुण मृत झाल्याचं समजून रस्त्यालगत विवस्त्र अवस्थेत फेकून दिलं होतं.

मारहाणीत गंभीर जखमी झालेल्या तरुणाची मृत्यूशी झुंज सुरु आहे. मुख्य आरोपी सतीश जगतापसह सात जणांविरोधात अंबी पोलीस स्टेशनमध्ये गुन्हा दाखल करण्यात आला आहे. या प्रकरणी तिघांना अटक करण्यात आली आहे. तर इतर आरोपी फरार आहेत. प्रेम प्रकरणातून ही मारहाण झाल्याची माहिती देण्यात आली आहे.