Chhatrapati Shivaji Maharaj Temple : महाराष्ट्रातील पहिल्या शिव मंदिराचे अयोध्या कनेक्शन, नेमकं कसं आहे हे मंदिर?

भिवंडी तालुक्यातील मराडे पाडा येथे महाराष्ट्रातील पहिले छत्रपती शिवाजी महाराज मंदिर उभारण्यात आले आहे. या मंदिराचे आज मुख्यमंत्री देवेंद्र फडणवीस यांच्या हस्ते लोकार्पण करण्यात आले. छत्रपती शिवाजी महाराजांच्या मूर्तीची प्राणप्रतिष्ठा, कलशारोहण विधी यांसह अनेक विधी पार पडले. गडकिल्ल्यासारखी रचना असलेले हे मंदिर दर्शनस्थळ नसून शक्तिपीठ म्हणून उभारण्यात आले आहे.

या मंदिराला दीड एकर जागेमध्ये तटबंदी आणि ४२ फूट उंच प्रवेशद्वार आहे. मंदिराच्या तटबंदीवर ३६ चबुऱ्यांवर शिवरायांच्या जीवनातील प्रसंगांचे देखावे साकारण्यात आले आहेत. मंदिराच्या गाभाऱ्यात ६ फूट उंच कृष्णशिला सिंहासनारूढ छत्रपती शिवाजी महाराज यांच्या मूर्तीची प्रतिस्थापना करण्यात आली आहे. विशेष म्हणजे अयोध्येतील राम मंदिरातील रामलल्लाची मूर्ती ज्या मूर्तिकाराने साकारली आहे, त्यांनीच शिवाजी महाराज मंदिरातील मूर्ती देखील साकारली आहे.

भिवंडीतील हे मंदिर शिवप्रेमींसाठी तीर्थस्थळ बनणार असल्याचे म्हटले जात आहे. शिवक्रांती प्रतिष्ठानचे संस्थापक राजूभाऊ चौधरी यांच्या संकल्पनेतून हे मंदिर उभारण्यात आले आहे. मिळालेल्या माहितीनुसार, आंतरराष्ट्रीय किर्तीचे मूर्तिकार अरुण योगीराज यांनी अखंड कृष्णशिला या दगडातून छत्रपती शिवाजी महाराज यांची सहा फूट उंचीची मूर्ती बनवली आहे. ही पहिलीच मूर्ती चार वर्षांपूर्वी बनवण्यासाठी दिली होती. पण रामलल्ला यांच्या मूर्तीच्या कामामुळे यामध्ये खंड पडला होता.

छत्रपती शिवाजी महाराज यांची मूर्ती बनवताना अरुण योगीराज यांनी विविध पैलूंचा अभ्यास केल्याचे शिवक्रांती प्रतिष्ठानच्या विश्वस्तांनी म्हटले आहे. महाराजांच्या जीवनावरील शौर्याचे प्रसंग, त्यांचा इतिहास समाजाला कळावा यासाठी मंदिराच्या तटबंदी खालील जागेत ३६ शिल्पचित्र बनवण्यात आली आहेत. त्याची माहिती मराठी आणि इंग्रजी भाषेत देण्यात आली आहे.