Chandrapur Firing: न्यायालयासमोरच गोळीबार! नाराळपाणी दुकानावर उभ्या असलेल्या तरुणावर धाडधाड झाडल्या गोळ्या

संजय तुकराम, साम प्रतिनिधी

राजुरा तालुका न्यायालयासमोरील परिसरात गोळीबाराची घटना घडल्यानं शहरात खळबळ उडाली. नारळपाणी विक्रीच्या दुकानाजवळ बसलेल्या एका तरुणावर दुचाकीवरून आलेल्या दोघांनी धाड-धाड गोळ्या झाडल्या. विनोद उर्फ पापा जाधव असं गोळीबारात मृत पावलेल्या तरुणाचे नाव आहे. मोटारसायकलवरून आलेल्या दोघांनी समोरून गोळीबार केला. या हल्ल्यात जाधव गंभीर जखमी झाले.

गोळीबारात डोक्यात आणि छातीत गोळ्या लागल्याने जाधव गंभीर जखमी झाले. त्यांना उपचारासाठी . प्राथमिक उपचारानंतर त्यांना पुढील उपचारासाठी चंद्रपूर जिल्हा रुग्णालयात हलविण्यात आले, मात्र त्यांचा मृत्यू झाला. घटनेनंतर राजुरा पोलिसांनी घटनास्थळी धाव घेत तपास सुरू केला. दरम्यान, या हत्येतील आरोपी करण मेकलवार (वय 22) आणि करण दीपक बावीसकर (वय 24) यांनी स्वतःहून राजुरा पोलीस ठाण्यात शरणागती पत्करली.

पोलिसांनी हत्येत वापरलेले शस्त्र ताब्यात घेतले आहे. हा हल्ला कशासाठी केला गेला, याचे कारण अजून समोर आलेले नाही. पापा जाधव हे सोमनाथपूर येथील रहिवासी होते. दरम्यान, गोळीबारामागील नेमके कारण अद्याप स्पष्ट झालेले नाही. पूर्ववैमनस्य, व्यावसायिक वाद किंवा अन्य कोणत्या कारणातून हा हल्ला झाला, याचा तपास पोलीस करीत आहेत.

राजुरा शहरात यापूर्वीही गोळीबाराच्या गंभीर घटना घडल्या असून, अशा घटनांमध्ये आतापर्यंत तिघांचा मृत्यू झाल्याची माहिती आहे. त्यामध्ये एका महिलेचाही समावेश आहे. त्यामुळे पुन्हा एकदा शहरातील कायदा व सुव्यवस्थेचा प्रश्न ऐरणीवर आलाय. न्यायालयासमोरील गजबजलेल्या परिसरातच गोळीबार झाल्याने नागरिकांच्या सुरक्षेचा मुद्दाही गंभीर बनला आहे.