Chandrapur Farmer: शेतीच्या फेरफारासाठी 2 वर्षे टाळाटाळ; तहसील कार्यालयातच शेतकऱ्यानं घेतला टोकाचा निर्णय

प्रशासनाच्या मुजोरीपणाचा आणि कामासाठी गरीब शेतकऱ्यां येरझऱ्या मारायला भाग पाडणाऱ्या अधिकाऱ्यामुळे एका शेतकऱ्यानं आपलं आयुष्य संपवलं. चंद्रपुरातील भद्रावती तहसील कार्यालयात विष घेऊन आत्महत्येचा प्रयत्न अधिकाऱ्याच्या मुजोरीला वैतागलेल्या शेतकऱ्याने केला होता. त्यानंतर त्याला रुग्णालयात दाखल करण्यात आले होते. परंतु त्यांचा मृत्यू झालाय.

परमेश्वर मेश्राम असे शेतकऱ्याचे नाव आहे. जमिनीचा फेरफार नोंद करण्यास तहसील कार्यालयातून सातत्याने टाळाटाळ होत असल्याने मेश्राम यांनी 26 सप्टेंबरला तहसील कार्यालयात विष प्राशन केलं. त्यानंतर तेथील काही नागरिकांनी मेश्राम यांना चंद्रपूर जिल्हा रुग्णालयातील अतिदक्षता विभागात भरती केलं. मात्र अखेर 10 दिवसांनी त्यांचा मृत्यू झाला.

परमेश्वर मेश्राम यांच्या मृत्यूनंतर त्यांच्या कुटुंबीयांनी मृतदेह ताब्यात घेण्यास नकार दिलाय. जमिनीचा फेरफार जोपर्यंत आमच्या नावावर होत नाही. शेतीचा ताबा मिळत नाही तोपर्यंत मृतदेह घेणार नाही अशी कुटुंबीयांची भूमिका घेतलीय. दरम्यान परमेश्वर मेश्राम यांची वडिलोपार्जित 8.5 एकर जमीन आहे. या जमिनीबाबत कोर्टात केस सुरू होती.

या केसचा निकाल मेश्राम यांच्या बाजूने लागला. पण तरीही गेल्या दोन वर्षांपासून तहसील कार्यालयातून त्यांच्या नावे फेरफार करण्यास टाळाटाळ केली जात होती. या प्रकरणी भद्रावतीचे तहसीलदार राजेश भांडारकर आणि नायब तहसीलदार सुधीर खांडरे यांच्यावर निलंबनाची कारवाई करण्यात आलीय.