Crime: नवऱ्याने बायकोला जिवंत जाळलं, घराचा दरवाजा बंद करून काढला पळ; चंद्रपूर हादरले

Summary -

• चंद्रपूरच्या गौतम नगरात विवाहितेला जिवंत जाळलं

• बायकोची हत्या करून नवऱ्याने घराचा दरवाजा बंद करून काढला पळ

• उपचारादरम्यान महिलेचा मृत्यू

• पोलिसांनी आरोपी नवऱ्याला अटक केली

चंद्रपूरमध्ये विवाहितेला जिवंत जाळल्याची धक्कादायक घटना समोर आली आहे. चंद्रपूर शहरातील महाकाली वार्डातील गौतम नगर भागात ही घटना घडली. ५ जानेवारीला ही घटना घडली होती. उपचारादरम्यान या महिलेचा मृत्यू झाला. महिलेच्या हत्येप्रकरणी पोलिसांनी तिच्या नवऱ्याविरोधात गुन्हा दाखल करत त्याला अटक केली. या घटनेमुळे चंद्रपूरमध्ये खळबळ उडाली आहे.

मिळालेल्या माहितीनुसार, चंद्रपूरच्या गौतमनगर परिसरात दीक्षा शुभम भडके (२७ वर्षे) या महिलेची नवऱ्याने ह त्या केली. ५ जानेवारीला ही घटना घडली होती. शुभमने रात्री ११ वाजता घरी येत दिक्षाला पेटवून दिले होते आणि दार बंद करून निघून गेला होता. आरडाओरडा झाल्यानंतर शेजारी राहणाऱ्यांनी घराचा दरवाजा उघडला तर त्यांना दिक्षा जळालेल्या अवस्थेत आढळून आली. जखमी अवस्थेत तिला चंद्रपूर येथील शासकीय रुग्णालयात दाखल करण्यात आले.

दिक्षाची प्रकृती गंभीर होती. उपचारादरम्यान ७ जानेवारीला तिचा मृत्यू झाला. या प्रकरणी दिक्षाच्या नातेवाईकांनी पोलिस ठाण्यात धाव घेत तक्रार दाखल केली होती. पोलिसांनी सखोल तपास करून दोषींवर कठोर कारवाई करण्याची मागणी केली. चंद्रपूर शहर पोलिसांनी या घटनेचा तपास करत दिक्षाच्या नवऱ्याला अटक केली. शुभमने दिक्षाची हत्या का केली यामागचे कारण अद्याप समोर आले नाही.