उच्च न्यायालयाचा शिंदेंच्या शिवसेनेला मोठा दणका; कोर्टानं दिला फक्त 8 आठवड्यांचा वेळ, नेमकं काय आहे प्रकरण?

मुंबई उच्च न्यायालयाने ठाणे महानगरपालिकेतील सत्ताधारी शिवसेनेला मोठा दणका दिलाय. महापालिकेच्या विविध समित्यांच्या निवडणुका आणि स्वीकृत नगरसेवकांची निवड रखडवल्याप्रकरणी दाखल करण्यात आलेल्या याचिकेवर सुनावणी करताना उच्च न्यायालयाने शिंदे गटाला फक्त 8 आठवड्यांचा वेळ दिलाय. यावेळेत त्यांना पाच प्रमुख पालिका समित्या आणि स्वीकृत नगरसेवकांच्या निवडणुका पूर्ण करण्याचे सक्त आदेश न्यायालयाने दिलेत.

८ आठवड्यात निवडणुका घ्या - उच्च न्यायालय

ठाणे महानगरपालिकेच्या निवडणुका होऊन अनेक महिने उलटलेत, तरी पालिकेची अत्यंत महत्त्वाची मानली जाणारी स्थायी समिती तसेच परिवहन समिती, शिक्षण समिती यांसारख्या एकूण पाच प्रमुख समित्यांच्या सभापती आणि सदस्यांच्या निवडणुका अद्याप पार पाडल्या नव्हत्या. यासह महापालिकेतील स्वीकृत नगरसेवकांची निवडही रखडवण्यात आली होती. या दिरंगाईविरोधात वकील सागर कदम यांनी मुंबई उच्च न्यायालयात याचिका दाखल केली होती. या याचिकेवर सुनावणी झाली यात न्यायालयाने ठाणे महापालिकेला 8 आठवड्यांच्या आत सर्व निवडणुका पूर्ण घेण्याचे निर्देश दिले आहेत.

ठाणे महानगरपालिकेत शिवसेनेची सत्ता आहे. भारतीय जनता पक्षाचा शिवसेनेच्या सत्तेला पाठिंबा दिलाय. परंतु शिवसेना जाणीवपूर्वक किंवा राजकीय कारणांमुळे स्वीकृत नगरसेवक आणि विविध समित्यांच्या नियुक्त्या जाहीर करत नसल्याची चर्चा होऊ लागली होती. त्या पार्श्वभूमीवर, कोर्टात दाखल झालेल्या या याचिकेमुळे राजकीय वर्तुळात उलट-सुलट चर्चांना उधाण आलंय.

न्यायालयाच्या या आदेशामुळे ठाणे महापालिकेला पुढील दोन महिन्यांच्या आत स्थायी समितीसह पाच समित्यांच्या निवडणुका घेणे बंधनकारक झाले आहे. अनेक दिवसांपासून प्रलंबित असलेला स्वीकृत नगरसेवकांच्या निवडीचा प्रश्न आता मार्गी लागणार आहे.