Ashok Kharat Case: भोंदूबाबा अशोक खरात प्रकरणात मोठी अपडेट, रुपाली चाकणकरांच्या बहिणीचं कनेक्शन उघड

Summary -

• अशोक खरात प्रकरणात मोठा खुलासा

• रुपाली चाकरणकर यांच्या बहिणीचं कनेक्शन समोर

• १०० कोटी रुपयांहून अधिक व्यवहार उघड

• एसआयटीकडून कसून तपास सुरू

भोंदूबाबा अशोक खरात प्रकरणात मोठी अपडेट समोर आली आहे. या प्रकरणात राष्ट्रवादी काँग्रेस अजित पवार गटाच्या महिला नेत्या रुपाली चाकणकर या अडचणीत आल्या आहेत. या प्रकरणात रुपाली चाकणकरांनंतर आता त्यांच्या बहिणीचेही कनेक्शन उघड झाले आहे. नाशिक जिल्ह्यामध्ये असलेल्या पतसंस्थांमध्ये रुपाली चाकणकर यांच्या बहिणीच्या नावाने खाते असल्याचे तपासातून उघड झाले आहे. या प्रकरणात रोज नवनवीन धक्कादायक खुलासे होत आहेत. आतापर्यंत या प्रकरणात अनेक राजकीय नेते, मंत्री, आमदार, अधिकाऱ्यांची नावं समोर आली होती.

मिळालेल्या माहितीनुसार, भोंदूबाबा अशोक खरातने अनेकांचे आधार कार्ड आणि पॅन कार्ड घेऊन कारनामे केले आहेत. नाशिक जिल्ह्यातील २ पतसंस्थांमध्ये खरात शेकडो खात्यांचा नॉमिनी आहे. धक्कादायक बाब म्हणजे रुपाली चाकणकरांच्या बहिणीच्या नावानेही या पतसंस्थांमध्ये खाते असल्याचं उघड झालं. या खात्यांमार्फत अशोक खरातने १०० कोटीहून अधिक रुपयांचे व्यवहार केल्याचे समोर आले आहे. अशोक खरात स्वत:च ही सगळी खातं हाताळत होता.

ज्या पतसंस्थांमध्ये खरातने अनेकांचे आधारकार्ड आणि पॅनकार्ड वापरून गैरव्यवहार केला होता. त्या सर्व खात्यांना खरातचाच मोबाईल नंबर लिंक आहे. या प्रकरणी आता दोन्ही पतसंस्थेचे चेअरमन आणि मॅनेजर यांची एसआयटीकडून चौकशी सुरू आहे. भोंदूबाबा अशोक खरातने ज्योतिषी असल्याचे सांगत शेकडोपेक्षा जास्त महिलांची फसवणूक केली. त्यांचे त्याने शारीरिक शोषण केले. या प्रकरणात खरातचे अनेक महिलांसोबतचे धक्कादायक व्हिडीओ देखील समोर आले आहे. या प्रकरणाची व्याप्ती दिवसेंदिवस वाढत चालली आहे. एसआयटी आणि नाशिक पोलिस या प्रकरणाचा कसून तपास करत आहेत.