Bhandara News: करवाढीविरोधात नगरवासियांचा एल्गार, मोहाडी नगरपंचायतीवर धडकला 'जनआक्रोश मोर्चा'

शुभम देशमुख, प्रतिनिधी

Bhandara Breaking News:

नगरपंचायत मोहाडीतर्फे नवीन करप्रणालीनुसार शहरातील नागरिकांवर भरमसाठ घर टॅक्स लादण्यात आल्याच्या निषेधार्थ नगरपंचायत कार्यालयावर जनआक्रोश मोर्चा काढण्यात आला. यावेळी नगराध्यक्षा छाया डेकाटे यांनी वाढीव कर पुढील कारवाईपर्यंत स्थगित करण्यात येईल, असे आश्वासन दिले. नगराध्यक्षांच्या या आश्वासनानंतर मोर्चामधील सहभागी नागरिकांनी मोठा जल्लोष केला.

याबाबत अधिक माहिती अशी की, मोहाडी (Mohadi) शहरात राहणाऱ्या नागरिकांवर निवासी आणि अनिवासी असे दोन प्रकारचे कर लावण्यात आले आहेत. ज्यांनी आपल्या घरी भाडेकरू ठेवले आहेत किंवा व्यावसायिक दुकानासाठी आपली खोली भाड्याने दिली आहे, त्यांच्यावर अनिवासी करप्रणाली अंतर्गत तिप्पट चौपट कर लावण्यात आला आहे.

याशिवाय शिक्षण कर वृक्ष कर, पर्यावरण कर, रोजगार हमी कर अग्निशमन कर लावण्यात आल्याने सामान्य नागरिकालाही पाच ते आठ हजार रुपयांपर्यंत आणि दुकाने, व्यावसायिक यांना १५ ते ४० हजार घर कर आकारण्यात येणार होते.

त्यासाठी नागरिकांनी मोहाडी नगरपंचायतीवर धडक मोर्चा काढला. दरम्यान, नागरिकांच्या आक्रमक भूमिकेनंतर पालिकेनेही नमती भूमिका घेतली. यावेळी नगराध्यक्षा छाया डेकाटे यांनी वाढीव कर पुढील कारवाईपर्यंत स्थगित करण्यात येईल, असे आश्वासन दिल्याने मोर्चेकरांनी एकच जल्लोष केला. (Latest Marathi News)

 ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)