बेळगावात मराठी कुटुंबानं उचललं टोकाचं पाऊल; विष प्राशन करून तिघांनी आयुष्य संपवलं, एकीची प्रकृती गंभीर | Belgaum

बेळगावातून मन हेलावून टाकणारी घटना उघडकीस आली आहे. एकाच मराठी कुटुंबातील सदस्यांनी आत्महत्येचा प्रयत्न केला. विष प्राशन करून त्यांनी सामूहिक आयुष्य संपवण्याचा निर्णय घेतला. चारपैकी तिघांचा मृत्यू झाला आहे. तर, एका महिलेची प्रकृती चिंताजनक असल्याची माहिती समोर आली आहे. आत्महत्येमागचं कारण अस्पष्ट असून, पोलिसांकडून अधिक तपास सुरू आहे.

कुराडेकर कुटुंब हे बेळगावातील जोशी मळा येथील रहिवासी होते. कुराडेकर कुटुंबातील चार जणांनी एकत्र विष प्राशन केलं. कुटुंबातील ४ जण घरात बेशुद्ध अवस्थेत आढळले. शेजारी राहणाऱ्यांच्या लक्षात ही घटना येताच त्यांनी तातडीने सर्वांना रुग्णालयात हलवलं. मात्र, डॉक्टरांनी तपासून तिघांना मृत घोषित केलं.

तर, एका महिलेची प्रकृती गंभीर असल्याची माहिती आहे. या घटनेत सुवर्णा कुराडेकर, मंगला कुराडेकर आणि संतोष कुराडेकर या तिघांचा मृत्यू झाला. तर, सुनंदा कुराडेकर यांची प्रकृती गंभीर आहे. त्यांच्यावर स्थानिक रूग्णालयात उपचार सुरू आहेत.

या घटनेची माहिती मिळताच शहापूर पोलिसांनी घटनास्थळी धाव घेतली असून, त्यांनी तपासाला सुरूवात केली. आत्महत्येमागील मुख्य कारण अद्याप स्पष्ट झालेले नाही. दरम्यान, पोलिसांकडून या घटनेचा सखोव तपास सुरू आहे. या घटनेनंतर परिसरात खळबळ उडाली आहे.