Beed Politics: बीडमध्ये राजकारण तापले! अमरसिंह पंडितांच्या पीएवर हल्ला, पाहा थरारक सीसीटीव्ही VIDEO

Summary -

• बीडच्या गेवराईमध्ये माजी आमदार अमरसिंह पंडित यांच्या पीएवर हल्ला

• २ डिसेंबरला मतदानाच्या दिवशी घडली होती घटना

• हल्ल्याचा सीसीटीव्ही व्हिडीओ समोर आला आहे

• व्हिडिओमध्ये पांढऱ्या रंगाची कार दुसऱ्या कारला धडक देताना दिसत आहे

योगेश काशीद, बीड

बीडच्या गेवराईमध्ये नगरपरिषद निवडणुकीच्या वादातून माजी आमदार अमरसिंह पंडित यांच्या पीएवर झालेल्या हल्ल्याचा सीसीटीव्ही व्हिडीओ समोर आला आहे. या व्हिडीओमध्ये एक पांढरी कार अमरसिंह पंडित यांच्या कार्यालयाबाहेर उभ्या असलेल्या स्कॉर्पिओला धडक देताना आणि त्यानंतर जमावाने हल्ला केल्याचे दिसत आहे. हा व्हिडीओ व्हायरल होत आहे. या घटनेमुळे सध्या बीडमधील राजकारण तापले आहे.

मिळालेल्या माहितीनुसार, '२ डिसेंबरला ही घटना घडली होती. या घटनेवेळी अमरसिंह पंडित यांचे स्वीय सहाय्यक अमृत डावखर यांना मारहाण झाल्याचा आरोप आहे. हा हल्ला माजी आमदार लक्ष्मण पवार यांचे बंधू बाळराजे पवार आणि त्यांच्या समर्थकांनी केल्याचा दावा करण्यात येत आहे. विद्यमान आमदार विजयसिंह पंडित यांच्या 'कृष्णाई' निवासस्थानावर हा प्रकार घडला होता. यामुळे बीडमधील पवार विरुद्ध पंडित हा राजकीय संघर्ष पुन्हा पेटला आहे.

बीडच्या गेवराईमध्ये नगरपरिषद निवडणुकीच्या मतदान प्रक्रियेदरम्यान माजी आमदार अमरसिंह पंडित यांच्या कृष्णाई कार्यालयावर आठ ते दहा जणांनी हल्ला केला होता. या हल्ल्यावेळी अमरसिंह पंडित यांच्या पीएवर हल्ला करण्यात आला होता. या हल्ल्यादरम्यानचा सीसीटीव्ही व्हिडीओ व्हायरल होत आहे. या व्हिडीओमध्ये आरोपी एका पांढऱ्या रंगाच्या कारमधून येतात. या कारमधून माजी आमदार लक्ष्मण पवार यांचे बंधू बाळराजे पवार हे ड्रायव्हर साईडच्या सीट वरून उतरताना दिसत आहेत.

अमरसिंह पंडित यांच्या कार्यालयाबाहेरील कारला धडक देऊन आरोपी कारमधून उतरतात आणि पळून जातात हे देखील व्हिडीओमध्ये दिसत आहे. दरम्यान, या घटनेनंतर आमदार विजयसिंह पंडित आणि माजी आमदार अमरसिंह पंडित यांनी पोलिस अधीक्षकांची भेट घेऊन लेखी तक्रार दिली. तर हा हल्ला माजी आमदार अमरसिंह पंडित यांच्या हत्येच्या उद्देशाने झाला होता असा दावा आमदार विजयसिंह पंडित यांच्यासह अमरसिंह पंडितांचे पीए अमृत डावखर यांनी केला आहे.