Women Group Farming : महिलांची गट शेतीतून क्रांती; ट्रॅक्टरने सगळी कामे करतात महिला, बीडच्या देवळा गावचा आदर्श

योगेश काशीद 
बीड : बीड जिल्ह्यातील ग्रामीण भागातील देवळा गावातील महिलांनी शेती क्षेत्रात एक अनोखी क्रांती घडवून आणली आहे. या गावातील ११ कुटुंबातील महिलांनी एकत्र येत गटाची स्थापना केली. त्या शेतीतील सर्व कामे स्वतः करू लागल्या. बीज प्रक्रिया ते काढणीपर्यंतच्या सर्व कामांमध्ये त्या प्राविण्य मिळवलेल्या आहेत. ट्रॅक्टर फवारणी यासारख्या विविध कामांमध्ये त्या एकमेकाला मदत करतात.

बीड जिल्ह्यातील ग्रामीण भागातील देवळा गावच्या ११ महिलांनी एकत्र येत ऑरगॅनिक ग्रामीण किसान शेतकरी गटाची स्थापना केली. या गटाच्या माध्यमातून त्या एकमेकींच्या शेतीत सांगड पद्धतीने काम करत आहेत. नांगरणी, पेरणी, खुरपणीसह आदी कामे सांगड पध्दतीने करत असल्याने त्यांच्या पैश्याची देखील बचत होत आहे. विशेष म्हणजे ट्रॅक्टर चालवण्यापासून सर्व कामे या महिला करतात.

कृषी विज्ञान केंद्र, पाणी फाउंडेशन आणि कृषी विभागाकडून या महिलांना वेळोवेळी मार्गदर्शन केले जाते. याबाबत योगिता खामकर सांगतात की मी शेतामध्ये खूप काम करायचे, मात्र माझे पती त्या कामाबद्दल अभिमान बाळगत नसत. मात्र मी गट शेतीच्या महिलांसोबत आल्यास माझं मन मोकळं झालं आणि मला सन्मान मिळू लागला.

सशक्तीकरणाच्या दिशेने पाऊल 
महिलांचे एकीकरण समाजातील इतर महिलांना निश्चित प्रेरणादायी ठरत आहे. त्यांच्या या यशाने इतर गावातील महिलांनाही अशा प्रकारचे गट तयार करण्यासाठी प्रोत्साहन मिळत आहे. यामुळे गावातील महिला सशक्तीकरणाच्या दिशेने एक महत्त्वपूर्ण पाऊल पडले आहे. गटाच्या महिला बैठकीच्या माध्यमातून एकत्र येऊन सर्वांच्या सुख दुःखात देखील सामील होतात.