Accident News : आधी पलटी झाली, नंतर पेट घेतला; बीडमध्ये प्रवाशांनी भरलेल्या ट्रॅव्हल्सचा भीषण अपघात; २५ प्रवासी गंभीर जखमी

Beed Kej Private Bus Accident बीडमधून मोठी बातमी समोर आली आहे. जळगाववरून लातूरकडे जाणाऱ्या प्रवाशांनी भरलेल्या ट्रॅव्हल्सचा भीषण अपघात झाला आहे. अपघातानंतर या बसने पेट घेतला आणि सगळीकडे आगीने रौद्ररूप धारण केले. या आगीत प्रवाशांच्या सामानाचे नुकसान झाले असून २५ प्रवासी गंभीर जखमी झाले आहेत. जखमींवर जवळच्या रुग्णालयात उपचार सुरु आहेत.

मिळालेल्या माहितीनुसार, एक खाजगी ट्रॅव्हल्स जळगाववरून लातूरकडे जात होती. ही ट्रॅव्हल्स केज मांजरसुंबा रोडवर पहाटे २.४५ वाजता केजपासून जवळ सांगवी ते पिंपळगाव फाट्यावर पलटी झाली. त्यानंतर बसने अचानक पेट घेतला. काही वेळातच आगीचे लोळ सर्वत्र पसरले.

चालकाच्या अतिवेगामुळे हा अपघात घडल्याचं म्हटलं जात आहे. या दुर्घटनेत २५ प्रवासी गंभीर जखमी झाले. घटनेची माहिती मिळताच अपघातस्थळी सहाय्यक पोलिस उपनिरीक्षक अमिरोद्दीन इनामदार आणि सहाय्यक पोलिस उपनिरक्षक शंभुदेव दराडे दाखल झाले.

अपघातग्रस्त प्रवाशांना ट्रॅव्हल्स मधून बाहेर काढले असून पोलिस प्रशासन व रुग्णवाहिका यांच्या मदतीने उपजिल्हा रुग्णालय केज येथे उपचारासाठी दाखल करण्यात आले आहे.या अपघातात प्रवाशांचे सामान जळून खाक झाले. काहींची महत्त्वाची कागदपत्र देखील गहाळ झाली. या दुर्घटनेनंतर प्रवाशांमध्ये भीतीचे वातावरण निर्मण झाले.