Alibag News : अलिबागमध्ये आंतरराष्ट्रीय कॉल सेंटरचा पर्दाफाश; परदेशी नागरिकांची केली जात होती फसवणूक

सचिन कदम 
अलिबाग : अलिबागमध्ये हॉटेलच्या नावाखाली अवैधपणे कॉल सेंटर चालविले जात होते. याबाबत पोलिसांना माहिती मिळाल्यानंतर पोलिसांनी धाड टाकत रात्री उशिरा कारवाई करून हा आंतरराष्ट्रीय कॉल सेंटरचा पर्दाफाश झाला आहे.  

अलिबागपासून (Alibag News) जवळच असलेल्या परहुर पाडा या ठिकाणी हॉटेलच्या नावाखाली हे कॉल सेंटर सुरू होते. या कॉल सेंटरमधून परदेशी नागरिकांची ऑनलाईन फसवणूक केली जात होती. या ठिकाणी रात्रीच्या वेळी २० ते २५ तरुण कॉल सेंटर चालवत होते. इथून अमेरिका व इतर देशांमध्ये फोनवरून संपर्क साधत आणि त्यांना सेक्स संबंधित गोळ्या, औषधे पुरवतो; असे सांगून त्यांच्याकडून पैशांची ऑनलाईन लूट केली जात असल्याची माहिती समोर येत आहे.  

या प्रकाराबाबत पोलिसांना (Alibag Police) माहिती मिळाल्यानंतर पोलिसांनी याठिकाणी धाड टाकली. अलिबाग पोलिसांनी रात्री उशिरा ही कारवाई केली असून पंचनामा आणि गुन्हा दाखल करण्याची प्रक्रिया अद्याप सुरू आहे. पोलिसांकडून काही जणांना ताब्यात घेण्यात आले असून या कॉल सेंटरमधून किती जणांची फसवणूक केली, याचा तपास केला जात आहे.