आवाज भयंकर येत होता म्हणून...अजित पवारांच्या विमानाचा शेवटचा व्हिडिओ ११ वर्षांच्या मुलीनं मोबाइलमध्ये केला कैद

राज्याला हादरवणारी घटना आज घडली. उपमुख्यमंत्री तथा पुणे जिल्ह्याचे पालकमंत्री अजित पवार यांचे आज विमान अपघातात निधन झाले. आज सकाळी बारामतीमध्ये झालेल्या विमान अपघातामध्ये अजित पवार यांच्यासह 5 जणांचा मृत्यू झाला. अजित पवार हे मुंबईहून जिल्हा परिषदेच्या निवडणूक प्रचारासाठी बारामतीला निघाले होते. बारामतीमध्ये पोहोचल्यानंतर लॅंडींगच्यावेळी विमानाचा अपघात झाला.

अजित पवार यांच्या मृत्यूनंतर अनेक फोटो आणि व्हिडिओ समोर येत आहे. यावेळी त्यांच्यासोबत विदीप जाधव, पिंकी माळी, कॅप्टन सुमित कपूर, कॅप्टन शांभवी पाठक हे सगळे सोबत होते. या सगळ्यांचा यामध्ये मृत्यू झाल्याने राज्यात शोककळा पसरली आहे.

बारामतीकडे जात असलेल्या आणि उपमुख्यमंत्री अजित पवार असल्याचा दावा करण्यात येत असलेल्या विमानाच्या अखेरच्या क्षणांचा व्हिडिओ आता समोर आला आहे. हा व्हिडिओ जळगाव सुपे येथील निशा सचिन खोमणे या अवघ्या ११ वर्षांच्या मुलीने आपल्या मोबाईलमध्ये टिपल्याची माहिती मिळत आहे.

निशा ही आपल्या घरी असताना अचानक वर आकाशात विमान गिरट्या घालत असल्याचा मोठा आवाज ऐकू आला. सतत घिरट्या घालत असलेले विमान पाहून ती घराबाहेर आली. त्यावेळी तिने मोबाईल कॅमेऱ्यात हा संपूर्ण प्रसंग रेकॉर्ड केला. काही वेळातच या विमानाचा अपघात झाल्याची बातमी समोर आली. सध्या हा व्हिडिओ सोशल मीडियावर वेगाने व्हायरल होत असून, अपघाताच्या आधीच्या क्षणांचे दृश्य असल्याचा दावा केला जात आहे. संबंधित विमानात अजित पवार असल्याचेही सांगितले जात आहे..