६ ६ ६ ६ ....दुर्दैवी योगायोग; अजित पवारांच्या अपघाती निधनानंतर सोशल मीडियावर चर्चा

Ajit Pawar Death : शब्दाचा पक्का माणूस, शिस्तबद्ध आणि वेगवान कामकाजासाठी अजित पवार यांना ओळखलं जायचं. एखादी प्रशासकीय फाईल समोर आल्यावर त्यावर त्वरित निर्णय घेणे आणि त्या निर्णयाची अंमलबजावणी शेवटच्या स्तरापर्यंत होते की नाही, यावर त्यांचा कटाक्ष होता. उपमुख्यमंत्री अजित पवार यांचं बारामतीमध्येच विमान अपघातात दुर्दैवी निधन झाले. ६६ व्या वर्षी अजित पवार यांनी जगाचा निरोप घेतला. अजित पवार यांच्या अकाली एक्झिटमुळे बारामती अन् राज्यावर दुखाचा डोंगर कोसळला. अजित पवारांचा अपघाती मृत्यू आणि ६ अंकाशी या घटनेचा असलेला संबंध हा दुर्दैवी योगायोग आहे, असं नेटकरी सोशल मीडियावर म्हणू लागलेत.

अजित पवार यांच्या जाण्याने राज्याच्या राजकीय आणि सामाजिक वर्तुळात कधीही भरून न निघणारी पोकळी निर्माण झाली आहे. अजित पवार यांच्या निधनानंतर समोर आलेला एक दुर्दैवी योगायोग संपूर्ण महाराष्ट्राला हेलावून टाकणारा आहे. ६६ वर्षे, ६ महिने आणि ६ दिवस इतके आयुष्य लाभलेल्या या नेत्याने आपल्या कार्यकाळात तब्बल ६ वेळा उपमुख्यमंत्री पदाची शपथ घेतली होती. '६' या अंकाचा हा विचित्र योगायोग सोशल मीडियावर व्हायरल होत आहे. ६ क्रमांक आणि अजित पवार यांच्यासोबतचा नियतीचा हा खेळ पाहून राज्यातील कार्यकर्ते भावूक झालेत. अजित पवार यांच्या आठवणी, संघर्ष आणि नेतृत्व कायम जनतेच्या मनात अजरामर राहील, यात शंकाच नाही.

अजित पवार फक्त राजकारणी नव्हते, तर त्यांची प्रशासनावर पकड असलेला एक कणखर नेता म्हणून ओळख होती. पहाटेची वेळ असो अथवा रात्री उशिरापर्यंतचे काम, अजित पवार यांची कधीही सामाजिक, राजकीय काम करण्याची तयारी असायची. . बारामती, पिंपरीसह पुणे जिल्ह्याच्या विकासापासून ते राज्याच्या कारभारापर्यंत योगदान अतुलनीय आहे. सत्ताधारी, विरोधकांसह सर्वांसोबतच त्यांची राजकीय मैत्री होती.