Ahmednagar Politics: निलेश लंकेंची खासदारकी धोक्यात? विखेंच्या मागणीला निवडणूक आयोगाचा हिरवा कंदील

लोकसभा निवडणुकीत पराभव झाल्यानंतर सुजय विखे पाटलांनी अहमदनगर जिल्ह्यातील 40 मतदान केंद्रांवर संशय घेत आक्षेप नोंदवला होता. मतदान केँद्रांवरील EVM आणि व्हीव्हीपॅटची पडताळणी करण्याची मागणी त्यांनी केली होती, हीच मागणी आयोगानं मान्य केलीये त्यामुळे लंकेंच्या खासदारकीचं काय होणार असा सवाल उपस्थित होतो.

अहमदनगर लोकसभा निवडणुकीत महायुतीचे पराभूत उमेदवार सुजय विखे पाटील यांनी EVMच्या पडताळणीची मागणी केली होती. ही मागणी मान्य करण्यात आल्यानं आता खासदार निलेश लंकेंचं टेन्शन वाढलंय.. सुजय विखे पाटील यांनी केलेल्या मागणीनुसार ईव्हीएम आणि व्हीव्हीपॅट मशीनची पडताळणी होणार आहे. या पडताळणीत काही उलटफेर झाल्यास लंकेंची खासदारकी धोक्यात येणार का असा सवाल उपस्थित होतोय. दरम्यान ही मोजणी आणि पडताळणी कशा पद्धतीने होणार आहे हे जाणून घेऊ.

असा होईल मॉकपोल

ईव्हीएम बनवलेल्या कंपनीचे अधिकारी मशीनची तांत्रिक तपासणी करतील.

आक्षेप घेतलेल्या 40 मतदानयंत्रांची मेमरी रिकामी केली जाईल.

यानंतर व्हीव्हीपॅट आणि ईव्हीएम मशीनवरील मतांची पडताळणी होईल.

एका मशीनमध्ये प्रत्येकी 1 ते 1400 मतं टाकता येईल.

ही संपूर्ण प्रक्रिया सीसीटीव्हीच्या देखरेखीखाली पार पडेल.

अहमगनगरचं राजकारण नेहमीच विखे घराण्याभोवती राहिलंय. भाजपनं राधाकृष्ण विखे पाटलांना गळाला लावलं. त्यानंतर भाजपच्याच तिकीटावर 2019 मध्ये सुजय विखें पहिल्यांदा खासदार झाले होते. मात्र या निवडणुकीत त्यांचा 28 हजार 929 मतांनी पवारांच्या राष्ट्रवादीचे उमेदवार निलेश लंके यांनी पराभव केला होता.त्यानंतर विखेंनी 40 मतदान केंद्रावरील EVM आणि VVPAT मशीनची पडताळणी करण्यासाठी जिल्हा निवडणूक विभागाकडे अर्ज केला होता. नेमक्या कोणत्या मतदान केंद्रावरील पडताळणीची मागणी केलीय ते पाहूयात.

यात अहमदनगर लोकसभा मतदारसंघातील श्रीगोंदा येथील 10, पारनेर 10, नगर 5, शेवगाव-पाथर्डी 5 , कर्जत- जामखेड 5, राहुरी येथील 5 अशा 40 केंद्रांवरील मतदान ईव्हीएम आणि व्हीव्हीपॅटची पडताळणी करण्याची मागणी केली. नगरच्या राजकारणात या घटनेनं मोठा ट्विस्ट आलायं. ईव्हीएम पडताळणीत काय निकाल समोर येतो त्यावर दोघांचं भवितव्य अवलंबून असणार आहे. 1991 ची पुनरावृत्ती होणार की यंदा लंकेंची खासदारकी धोक्यात येणार याचीच उत्सुकताय..