Ahmednagar News: ऐन दिवाळीत पाणीप्रश्न पेटणार; शिंदे गटाच्या खासदारांचा जायकवाडीला पाणी सोडण्यास विरोध

सचिन बनसोडे

Ahmednagar News:

अहमदनगर आणि नाशिक जिल्ह्यातील धरणातून जायकवाडी धरणात पाणी सोडण्याच्या निर्णयावर नेत्यांसह शेतकरी आक्रमक झाले आहेत. पाणी जर सोडले तर नगर नाशिकमधील शेतकरी उध्वस्त होणार असल्याचे शिंदे गटाचे शिर्डीचे खासदार सदाशिव लोखंडे यांनी म्हटले असून पाणी सोडण्यास विरोध केलाय.

समन्यायी पाणी वाटप कायद्याचा आधार घेत नगर -नाशिकमधील धरणांतून मराठवाड्यातील जायकवाडी धरणात पाणी सोडण्याचा आदेश देण्यात आलाय. जवळपास साडेआठ टिएमसी पाणी सोडण्यात येणार असल्याने नगर नाशिकमधील शेतकरी संकटात सापडणार आहेत.

एकीकडे निळवंडे धरणातून दुष्काळग्रस्त भागात सोडलेले पाणी अनेक गावात पोहचलेच नाही. त्यामुळे संतप्त झालेले शेतकरी जायकवाडीला पाणी सोडणार असल्याने हवालदिल झाले आहेत. आज खासदार सदाशिव लोखंडे यांनी शिर्डीत बैठक घेतली आणि पाणी सोडण्याच्या निर्णयाला विरोध केलाय.

2005 साली झालेला काळा कायदा आज नगर नाशिकवर अन्याय करणारा असून इथल्या सर्वपक्षीय नेत्यांनी एकत्र येवून यासाठी लढा देण्याची गरज असल्याचं खासदार सदाशिव लोखंडे यांनी म्हणटलंय. हा प्रश्न कायमस्वरूपी सोडवायचा असेल तर पश्चिमेकडे वाहून जाणारे पाणी गोदावरी खोर्‍यात वळवण्याची गरज असल्याचंही त्यांनी म्हणटलंय.