Ahilyanagar : गावात भैरवनाथ महाराजांची यात्रा; घरात सफाई काम करताना दुर्दैवी घटनेत मायलेकाचा मृत्यू

अहिल्यानगर : गावामध्ये भैरवनाथ महाराजांची यात्रोत्सव भरत असतो. यामुळे घरी पाहुण्याची ये- जा होणार असल्याने घरात साफसफाईचे काम करण्यात येत होते. सदरचे काम करत असताना विजेचा झटका लागून मायलेकाचा जागीच मृत्यू झाल्याची दुर्दैवी घटना चांडगाव येथे घडली. मायलेकाचं मृत्यूच्या घटनेमुळे गावावर शोककळा पसरली आहे.

अहिल्यानगर तालुक्यातील चांडगाव येथील राजेंद्र लोंढे (वय ४५) आणि सखूबाई लोंढे (वय ७५) असे मृत झालेल्या मुलगा व आईचे नाव आहे. दरम्यान तालुक्यातील चांडगाव येथील ग्रामदैवत भैरवनाथ महाराजांची यात्रा सुरू होत आहे. यात्रेनिमित्त गावात जोरदार तयारी करण्यात येत असते. तर गावातील सर्वच नागरिक घरात साफसफाई करत असतात. त्यानुसार राजेंद्र लोंढे हे देखील घराची स्वच्छता करण्याचे काम करत होते. 

मुलाला उचलायला गेलेल्या आईलाही बसला झटका 

साफसफाई करत असताना राजेंद्र लोंढे यांना लोखंडी ग्रीलमध्ये उतरलेल्या विजेच्या प्रवाहाचा धक्का लागला. जोराचा झटका बसल्यामुळे ते खाली पडले. खाली पडल्यामुळे त्यांच्या शरीरात देखील विजेचा प्रवाह सुरूच राहिला. याचवेळी घरात असलेली त्यांची आई सखूबाई या मुलाच्या मदतीसाठी गेल्या. त्यांनी खाली पडलेल्या मुलाला उचलण्याचा प्रयत्न केला असता त्यांनाही विजेचा धक्का बसला.

यात्रेतील कार्यक्रम केले रद्द 

घडलेल्या प्रकारानंतर दोघा माय- लेकांना उपचारासाठी श्रीगोंदे येथील खासगी रुग्णालयात दाखल करण्यात आले. परंतु, उपचारापूर्वीच दोघांचाही मृत्यू झाला होता. या दुर्दैवी घटनेमुळे गावावर शोककळा पसरली आहे. या घटनेमुळे गावकऱ्यांनी यात्रेच्या दिवशी आयोजित कार्यक्रम स्थगित करून लोंढे कुटुंबाच्या दुःखात सहभागी होण्याचा निर्णय घेतला आहे.