Accident : मजुरांना घेऊन जाणाऱ्या टेम्पोला एसटीची धडक, २ महिलांचा जागीच मृत्यू; ५ गंभीर

बुलढाण्यातून धक्कादायक बातमी समोर आली आहे. मजुरीच्या शोधात आलेल्या परराज्यातील दोन महिला मजुरांवर काळाने घाला घातला आहे. मालवाहू वाहनाला भरधाव बसने धडक दिल्याने भीषण अपघात झाला. या अपघातात दोन महिलांचा जागीच मृत्यू झाला असून ५ जण गंभीर जखमी आहेत. जखमींना जवळच्या रुग्णालयात उपचारासाठी दाखल करण्यात आले आहे.

मिळलेल्या माहितीनुसार, देऊळगाव राजा येथील कापूस जिनिंगमध्ये परराज्यासह अमरावती जिल्ह्यातून आलेल्या अनेक महिला मजुरांचे वास्तव्य आहे.. रोजीरोटीच्या शोधात आलेल्या या महिला कापूस वेचण्यासाठी पिंपळगाव येथे जाण्यासाठी मालवाहू पिकअप मध्ये चढत होत्या. याच दरम्यान जाफराबाद- जालना मार्गावरून जाणाऱ्या एसटी बस ने पिकअपला मागून जोरदार धडक दिली.

या भीषण अपघातात दोन मजूर महिलांचा जागीच मृत्यू झाला असून ५ महिला गंभीर जखमी आहेत. या दुर्घटनेत मृत झालेल्या महिलांचे नाव मायाबाई सुरज काजले (वय 32), मुक्काम रामखेरा, ता. खगनार, जि. बुरहानपूर, रिचाय काल्या कासदेकर (वय 72), मुक्काम नांदुरी, ता. धारणी, जि. अमरावती असे आहे.

जखमी महिलांना प्राथमिक उपचारांनंतर जालना येथील घाटी रुग्णालयात हलविण्यात आले असून त्या सर्वांच्या प्रकृतीची स्थिती गंभीर असल्याचे रुग्णालय प्रशासनाने सांगितले. दरम्यान या दुर्घटनेबाबत पोलीस अधिक तपास करत असून मृत मजूर महिलांच्या कुटुंबियांवर दुःखाचा डोंगर कोसळला आहे.