आझाद मैदानावर मराठा-OBC भिडणार? राज्यात पुन्हा आरक्षणाचं राजकारण तापणार

राज्यात पुन्हा एकदा आरक्षणावरून राजकारण तापणार आहे. मुंबईतल्या आझाद मैदानावर मराठा आणि ओबीसी समाज आमने-सामने येणार आहेत. मात्र, पोलीस परवानगीवरून दोन्ही समाजात कुरघोडी सुरू आहेत. त्यामुळे आरक्षण मिळवण्याच्या आणि टिकवण्याच्या लढाईत कोण बाजी मारणार ?पाहूयात यावरचा एक रिपोर्ट.

मंबईतल्या आझाद मैदानावर मराठा आणि ओबीसी समाज एकमेकांना भिडण्याची चिन्हे आहेत. कुणबी नोंदींवरून मराठा आंदोलक मनोज जरांगेंनी मुंबईत आंदोलनाचा इशारा दिल्यानंतर आता ओबीसी नेते लक्ष्मण हाकेंनीही आंदोलनाची हाक दिलीये. मराठा आरक्षणावरून जरांगेंनी आझाद मैदानातील आंदोलनाच्या परवानगीसाठी पोलिसांना पत्रही लिहलयं.

त्यामुळे जरांगेंचं 29 ऑगस्टचं आंदोलन नियोजित अंतरवाली सराटीत न होता मुंबईत होण्याची चिन्हे आहेत. मराठ्यांनी आक्रमक पवित्रा घेतला असताना ओबीसी समाजानेही एक पाऊल पुढे टाकलंय. लक्ष्मण हाके यांनी जरांगेंवर टीका करत 1 सप्टेंबरला चलो मुंबईचा नारा दिलाय. यासाठी ओबीसी आंदोलकांनी जरांगेंच्या आधीच आझाद मैदानासाठी पोलीसांकडे परवानगी मागितलीये.

राज्यात आरक्षणाच्या मुद्द्यावरून पुन्हा राजकारण तापलंय. एकीकडे अनुसूचित जातीत उपवर्गीकरण करण्याची मागणी केली जात आहे. तर दुसरीकडे, आझाद मैदानावरून मराठा आणि ओबीसी समाज आमनेसामने आले आहेत. विशेष म्हणजे, मराठा आणि ओबीसी संघटनांनी आधीच आझाद मैदानासाठी अर्ज केल्यामुळे कायदेशीर पेच निर्माण झाल्याचं बोललं जातंय. दोन्ही समाजांनी आझाद मैदानाची मागणी केल्यानं पोलीस प्रशासन कोणाला परवानगी देणार आणि आझाद मैदानावर मराठा-ओबीसी एकमेकांना भिडणार का?, याकडे सगळ्यांचं लक्ष लागलंय.