Veen Doghantali Hi Tutena Video : तिच्या मनातलं प्रेम ओठांवर येण्याआधीच...; 'वीण दोघांतली ही तुटेना' मालिकेत मोठा ट्विस्ट, समर-स्वानंदीच्या नात्याचं पुढे काय होणार?

'वीण दोघांतली ही तुटेना' मालिकेत रोज नवीन ड्रामा पाहायला मिळत आहे. अंशुमनच्या लग्नानंतर घरात एकामागोमाग एक वादळ येताना दिसत आहे. सध्या मालिकेत अंशुमन आणि सुष्मिताच्या रिसेप्शनचा कार्यक्रम पाहायला मिळत आहे. मात्र अंशुमन चालाखीने या कार्यक्रमात गोंधळ घालतो. अंशुमन स्वानंदीने रिसेप्शनसाठी सुष्मिताला दिलेली साडी बदलतो आणि त्याऐवजी एक वेस्टर्न ड्रेस तिकडे ठेवतो, जे घालून सुष्मिता रिसेप्शनला येते, सर्वजण पाहतच राहतात.

सुष्मिता सर्वांना सांगते की हा ड्रेस मला स्वानंदीनेच रिसेप्शनसाठी दिला आहे. मात्र स्वानंदी हे ऐकताच थक्क होते. तिला काही समजत नाही की साडीच्या ठिकाणी हा वेस्टर्न ड्रेस कुठून येतो. लांब उभा राहून अंशुमन स्वानंदीची मजा घेत राहतो. घरातील सर्व प्रकार पाहून सदस्य स्वानंदीला खूप बोलतात. मात्र तिला काहीच समजत नाही. त्यानंतर 'वीण दोघांतली ही तुटेना' मालिकेचा नवीन प्रोमो समोर आला आहे. ज्यात स्वानंदी ढसाढसा रडताना दिसत आहे.

व्हिडीओमध्ये तुम्ही पाहू शकता की, समर आणि स्वानंदी रुममध्ये एकत्र बसलेले असतात. तेव्हा स्वानंदी ढसाढसा रडत असते. तिला रडताना पाहून समर अस्वस्थ होतो आणि स्वानंदीला समजावतो. स्वानंदी म्हणते की, "मला माफ करा माझ्याकडे पुरावा नाही आहेतुम्हाला द्यायला...पण मी साडीच दिली होती..." त्यावर समर म्हणतो की, "माझा तुमच्यावर पूर्ण विश्वास आहे...तुमच्यावर विश्वास ठेवण्यासाठी मला कोणत्याही पुराव्याची गरज नाही आहे..." त्यानंतर समर स्वानंदीला शांत राहण्यास सांगतो. तिला पाणी देतो, तिच्या डोक्यावर हात ठेवतो. तसेच तिचा हात हातात घेऊन बसतो. हे सर्व पाहून स्वानंदी भारावून जाते. समर स्वानंदीचे डोळे पुसतो आणि तिच्याशी बोलतो.

झी मराठीने शेअर केलेल्या या व्हिडीओला एक खास कॅप्शन दिले आहे. कॅप्शनमध्ये लिहिलं की, "तिच्या मनात फुललेलं प्रेम ओठांवर आलं नाही, त्याच्या नजरेतलं प्रेम तिच्यापासून लपलं नाही!" समर -स्वानंदीच्या नात्यात प्रेम खुलताना दिसत आहे. या प्रोमोवर प्रेक्षक भरभरून कमेंट करत आहेत. तसेच समर-स्वानंदीच्या जोडीचे कौतुक करत आहे. तेजश्री प्रधान-सुबोध भावे मुख्य भूमिकेत असलेली 'वीण दोघांतली ही तुटेना' मालिकेत पुढे काय होणार पाहणे मनोरंजक ठरणार आहे. समर खरं सत्य कसं सर्वांसमोर घेऊन येणार हे पाहणे महत्त्वाचे ठरेल. 'वीण दोघांतली ही तुटेना' मालिका दररोज 7:30 वाजता झी मराठीवर पाहायला मिळते.