Monalisa: 'मला १० वेळा हात लावला...'; महाकुंभ व्हायरल गर्ल मोनालिसाचा प्रसिद्ध दिग्दर्शकावर गंभीर आरोप

Monalisa On Sanoj Mishra: ‘महाकुंभ व्हायरल गर्ल’ म्हणून ओळख मिळवलेली मोनालिसा भोसले सध्या पुन्हा एकदा चर्चेत आली आहे. अलीकडेच तिने केरळमध्ये तिचा मुस्लिम प्रियकर फहमान खान याच्यासोबत हिंदू पद्धतीने लग्न केले. या अचानक झालेल्या लग्नामुळे सोशल मीडियावर खळबळ उडाली असून, या कपलवर ‘लव्ह जिहाद’चे आरोप करण्यात आले आहेत. या वादात आता मोनालिसाने दिग्दर्शक मनोज मिश्रा यांच्यावर गंभीर आरोप केले आहे.

कोची येथील पत्रकार परिषदेत मोनालिसा पती फहमानसोबत माध्यमांसमोर आली. यावेळी तिने रडत सांगितले की, तिला आणि तिच्या पतीला सध्या धमक्या दिल्या जात आहेत आणि त्यांच्यावर प्रचंड दबाव टाकला जात आहे. याच दरम्यान तिने मनोज मिश्रा यांच्या वर्तनाबाबत धक्कादायक खुलासे केले.

मोनालिसाने आरोप केला की, चित्रपटात काम देण्याच्या बहाण्याने मनोज मिश्रा यांनी तिच्याशी अयोग्य वर्तन केले. “त्यांनी अनेकदा मला अयोग्यरित्या स्पर्श केला. मी काय सहन केलं आहे, हे फक्त मलाच माहीत आहे,” असे ती म्हणाली. तिने पुढे सांगितले की, जेव्हा तिने हा प्रकार आपल्या कुटुंबीयांना सांगितला, तेव्हा त्यांनीही तिची साथ दिली नाही. तिने मनोज मिश्रा यांच्यावर तरुणींना कामाचे आमिष दाखवून त्यांचे शोषण करत असल्याचा आरोप केला. ती म्हणाली, “तो मुलींना चित्रपटात काम देण्याचे आश्वासन देतो आणि बदल्यात अयोग्य मागण्या करतो.” या आरोपांमुळे चित्रपटसृष्टीत मोठी खळबळ उडाली आहे.

पोलिसांत तक्रार का केली नाही, यावर बोलताना मोनालिसाने सांगितले की, 'मी तक्रार करण्याचा विचार केला होता; मात्र कुटुंबीयांनी मला थांबवले. माझ्या कुटुंबीयांनी साथ दिली नाही, त्यामुळे मी एकटी पडले,' असे ती म्हणाली. यासह तिने सरकारकडे मदतीचीही मागणी केली आहे. याशिवाय, ती म्हणाली, 'मनोज मिश्रा माझ्या पतीला दहशतवादी ठरवण्याचा प्रयत्न करत आहे जे पूर्णपणे खोटे आहे.'

दरम्यान, ११ मार्च रोजी केरळमध्ये झालेल्या या लग्नानंतर मोनालिसा आणि फहमान यांना सतत धमक्या मिळत असल्याचेही समोर आले आहे. या संपूर्ण प्रकरणामुळे सोशल मीडियासह चित्रपटसृष्टीत मोठी चर्चा रंगली आहे.