Gondhal Movie: ऑस्करच्या शर्यतीत मराठी चित्रपटाची एंट्री! 'गोंधळ'ची भारताची अधिकृत प्रवेशिका म्हणून निवड

Gondhal Movie: मराठी चित्रपटसृष्टीसाठी एक आनंदाची आणि अभिमानाची बातमी समोर आली आहे. दिग्दर्शक संतोष डावखर यांच्या ‘गोंधळ’ या मराठी चित्रपटाची 99व्या अकादमी पुरस्कारांसाठी म्हणजेच ऑस्कर २०२७साठी भारताची अधिकृत प्रवेशिका म्हणून निवड झाल्याची माहिती समोर आली आहे. ‘बेस्ट इंटरनॅशनल फीचर फिल्म’ या श्रेणीत भारताचे प्रतिनिधित्व करण्यासाठी ‘गोंधळ’ची निवड झाल्याचे सांगितले जात आहे.

महाराष्ट्राच्या पारंपरिक ‘गोंधळ’ लोककलेच्या पार्श्वभूमीवर आधारित असलेला हा चित्रपट संतोष डावखर यांनी दिग्दर्शित केला आहे. चित्रपटात परंपरा, मानवी नातेसंबंध, संघर्ष आणि भावनिक गुंतागुंत यांचा वेध घेण्यात आला आहे.

‘गोंधळ’ला यापूर्वीही मोठा सन्मान

‘गोंधळ’ चित्रपटाने यापूर्वी आंतरराष्ट्रीय स्तरावर आपली छाप पाडली आहे. 56व्या आंतरराष्ट्रीय चित्रपट महोत्सवात (IFFI) संतोष डावखर यांना ‘गोंधळ’साठी सर्वोत्कृष्ट दिग्दर्शकाचा प्रतिष्ठित रौप्य मयूर पुरस्कार प्रदान करण्यात आला. चित्रपटाच्या कथनशैली, परंपरेचा वापर आणि मांडणीचे ज्युरीकडून कौतुक करण्यात आले.

IFFIच्या अधिकृत माहितीनुसार ‘गोंधळ’ची कथा ग्रामीण महाराष्ट्रातील पारंपरिक गोंधळ आणि त्याभोवती घडणाऱ्या नाट्यमय घटनांवर आधारित आहे. चित्रपटात सुमन या महिलेच्या आयुष्यातील संघर्ष, नातेसंबंध आणि स्वातंत्र्याच्या धडपडीची कथा मांडण्यात आली आहे.

मराठी चित्रपटाला जागतिक व्यासपीठ

मराठी चित्रपटांनी गेल्या काही वर्षांत आशयघन कथा, वेगळे विषय आणि प्रयोगशील मांडणीच्या माध्यमातून राष्ट्रीय तसेच आंतरराष्ट्रीय पातळीवर लक्ष वेधले आहे. अशा पार्श्वभूमीवर ‘गोंधळ’ला ऑस्करसाठी प्रवेशिका म्हणून संधी मिळाल्याची माहिती मराठी चित्रपटसृष्टीसाठी महत्त्वाची मानली जात आहे. त्यामुळे ‘गोंधळ’च्या ऑस्कर प्रवासाकडे आता मराठी चित्रपटप्रेमींचे लक्ष लागले आहे.