Actress Hospitalized: दिग्गज अभिनेत्रीची तब्येत बिघडली; हॉस्पिटल मधील फोटो व्हायरल; नाकातील ट्यूब पाहून चाहते चिंतेत

Actress Hospitalized: दाक्षिणात्य चित्रपटसृष्टीतील लोकप्रिय अभिनेत्री आणि डान्सर डिस्को शांती यांच्या एका फोटोने सध्या चाहत्यांची चिंता वाढवली आहे. ८० आणि ९०च्या दशकात आपल्या दमदार नृत्यामुळे आणि ग्लॅमरस भूमिकांमुळे प्रसिद्ध झालेल्या डिस्को शांती यांनी सोशल मीडियावर हॉस्पिटलमधील एक फोटो शेअर केला आहे. या फोटोमध्ये त्यांच्या नाकातून एक ट्यूब लावलेली दिसत आहे. मात्र, आपल्या प्रकृतीबाबत त्यांनी कोणतीही सविस्तर माहिती दिलेली नाही.

डिस्को शांती यांनी फोटो शेअर करताना केवळ ‘बॅक टू होम’ असे कॅप्शन लिहिले. त्यामुळे त्या हॉस्पिटलमधून घरी परतल्याचे स्पष्ट होत आहे. मात्र, त्यांना नेमका कोणता त्रास झाला होता, त्यांना हॉस्पिटलमध्ये का दाखल करण्यात आले होते किंवा त्यांच्यावर कोणते उपचार करण्यात आले, याबाबत कोणतीही अधिकृत माहिती समोर आलेली नाही.

त्यांच्या हॉस्पिटलमधील फोटोमुळे चाहत्यांमध्ये चिंता निर्माण झाली आहे. सोशल मीडिया पोस्टच्या कमेंट सेक्शनमध्ये अनेक चाहत्यांनी त्यांच्या प्रकृतीबाबत विचारणा केली असून, लवकर बरे होण्यासाठी शुभेच्छा दिल्या आहेत. सध्या डिस्को शांती यांनी घरी परतल्याची माहिती दिली आहे.

८०-९०च्या दशकात गाजलं नाव

डिस्को शांती या ८० आणि ९०च्या दशकातील लोकप्रिय अभिनेत्री आणि डान्सर्सपैकी एक म्हणून ओळखल्या जातात. त्यांनी तमिळ, तेलुगू, कन्नड, मल्याळम, हिंदी आणि ओडिया भाषांमधील चित्रपटांमध्ये काम केलं आहे. विशेषतः त्यांच्या डान्स नंबरची त्या काळात मोठी चर्चा होती. १९८३ मध्ये ‘वसंतमे वरुगा’ या तमिळ चित्रपटातून त्यांनी अभिनय क्षेत्रात पदार्पण केला होता.

लग्नानंतर घेतला चित्रपटांपासून ब्रेक

अभिनेत्री म्हणून लोकप्रिय असतानाच डिस्को शांती यांनी अभिनेता श्रीहरी यांच्याशी विवाह केला. लग्नानंतर त्यांनी चित्रपटसृष्टीपासून काहीसं अंतर घेतलं. २०१३ मध्ये श्रीहरी यांचं निधन झाल्यानंतर त्या मनोरंजनविश्वापासून आणखी दूर राहिल्या. दरम्यान, आता जवळपास तीन दशकांनंतर डिस्को शांती पुन्हा अभिनय क्षेत्रात कमबॅक करण्याच्या तयारीत असल्याचं वृत्त आहे. ‘पुल्ला’ या प्रोजेक्टमधून त्या पुन्हा पडद्यावर दिसणार असल्याची माहिती समोर आली आहे.