'त्यांना काही काम नसतं, फक्त..' सचिन पिळगावकरांच्या ट्रोलिंगवर लेक श्रिया काय म्हणाली?

मराठी सिनेसृष्टीतील ज्येष्ठ अभिनेते सचिन पिळगावकर यांची कन्या श्रिया पिळगावकर ही देखील नामांकित कलाकार आहे. सचिन पिळगावकर यांचे अनेक मुलाखतीचे व्हिडिओ व्हायरल होतात. सचिन बऱ्याचदा आपल्या मुलाखतीतून जूने शूटिंगदरम्यानचे किस्से सांगतात. मात्र, त्यांच्या वक्तव्यावरून अनेकदा त्यांना ट्रोल केलं जातं. सचिन पिळगावकर यांच्या ट्रोलिंगवर त्यांची लेक श्रिया हिनं पहिल्यांदाच भाष्य केलं आहे.

एका मराठी वेबसाईटला दिलेल्या मुलाखतीत श्रिया म्हणाली, 'या सगळ्या गोष्टी खेदजनक आहेत. पण आम्हा लोकांना ट्रोलिंगची इतकी सवय झाली आहे की, आता त्याबद्दल काहीच वाटत नाही. ट्रोलर्सना खरंतर काहीच काम नसतं. म्हणून ते आम्हा कलाकारांना ट्रोल करतात', असं श्रिया म्हणाली.

'शेवटी माझ्या बाबांना मायबाप प्रेक्षकांकडून अमाप प्रेम मिळालं आहे. त्यापुढे हे ट्रोलिंग काहीच नाही. लक्ष वेधून घेण्यासाठी ट्रोलर कोणत्याही थराला जाऊ शकतात. सोशल मीडियाचं जग असंच असतं. त्यामुळे सोशल मीडियाच्या गोष्टी फार मनावर नाही लावून घ्यायच्या. कृतज्ञ राहून चांगलं काम करत राहायचं', असंही श्रिया म्हणाली.

आईवडिलांप्रमाणे श्रियाही नामांकित कलाकार बनली आहे. श्रियानं आतापर्यंत चित्रपट तसेच वेबसीरिजमध्ये काम केलं आहे.