Influencer Arrested: व्ह्यूजसाठी प्रसिद्ध युट्यूबचं महिलांसोबत धक्कादायक कृत्य; व्हिडिओ व्हायरल होताच पोलिसांनी दाखवला इंगा

Influencer Arrested: सोशल मीडियावर व्ह्यूज आणि फॉलोअर्स वाढवण्यासाठी काही जण कोणत्याही थराला जात असल्याचे अनेकदा समोर येते. अशीच एक धक्कादायक घटना आता दिल्लीत उघडकीस आली आहे. 'रोड सेफ्टी वाला' नावाचे सोशल मीडिया चॅनेल चालवणारा युट्युबर गुरमन सिंग याला दिल्ली पोलिसांनी अटक केली आहे. महिलांच्या आणि अल्पवयीन मुलींच्या स्कूटर व दुचाकींना मुद्दाम धडक देऊन त्यांचे व्हिडिओ तयार करणे आणि ते सोशल मीडियावर अपलोड करणे, असा गंभीर आरोप त्याच्यावर आहे.

मिळालेल्या माहितीनुसार, २ जून रोजी दिल्ली पोलिसांकडे एका व्यक्तीने तक्रार दाखल केली होती. तक्रारदाराने सांगितले की, त्यांच्या अल्पवयीन मुलीच्या स्कूटरला दोन अनोळखी व्यक्तींनी मागून धडक दिली. त्यानंतर त्या मुलीचा पाठलाग करत तिच्यावर अश्लील कमेंट केली. काही दिवसांनी संबंधित मुलीचा व्हिडिओ यूट्यूब आणि फेसबुकवर अपलोड झाल्याचे कुटुंबाच्या लक्षात आले. त्यानंतर पोलिसांनी तत्काळ गुन्हा दाखल करून तपास सुरू केला.

तपासादरम्यान पोलिसांनी आरोपीच्या सोशल मीडिया अकाऊंटची तपासणी केली. त्यामध्ये महिला आणि अल्पवयीन मुलींना टार्गेट करून अनेक व्हिडिओ तयार केल्याचे लक्षात आले. तांत्रिक पुरावे आणि डिजिटल तपासाच्या आधारे पोलिसांनी ३२ वर्षीय गुरमन सिंग याला अटक केली.

चौकशीदरम्यान आरोपीने धक्कादायक कबुली दिली. सोशल मीडियावर अधिक फॉलोअर्स, व्ह्यूज आणि आर्थिक कमाई मिळवण्यासाठी तो मुद्दाम महिलांना टार्गेट करत असल्याचे त्याने मान्य केले. रस्त्यावर एकट्या जाणाऱ्या महिला, मागे बसलेल्या महिला प्रवासी आणि अल्पवयीन मुलींच्या गाड्यांना तो जाणीवपूर्वक धडक द्यायचा.

विशेष म्हणजे, धडक दिल्यानंतर संशय येऊ नये म्हणून तो लगेच 'सॉरी दीदी' असे म्हणत माफी मागायचा. दरम्यान, त्याचा साथीदार संपूर्ण घटना कॅमेऱ्यात रेकॉर्ड करायचा. संबंधित महिलांची किंवा मुलींची कोणतीही परवानगी न घेता हे व्हिडिओ सोशल मीडिया प्लॅटफॉर्मवर अपलोड केले जात होते. या प्रकरणात दिल्ली पोलिसांनी व्हिडिओ शूटिंगसाठी वापरण्यात आलेले कॅमेरे आणि इतर साहित्यही जप्त केले आहे. आरोपीविरुद्ध पोक्सो (POCSO) कायद्यासह इतर संबंधित कलमांखाली गुन्हा दाखल करण्यात आला असून, या रॅकेटमध्ये आणखी कोणी सहभागी आहे का, याचाही तपास सुरू आहे.