Mumbai Crime : सोशल मीडियावरील मैत्री पडली महागात; नेपाळहून मुंबईत आलेल्या १५ वर्षीय मुलीवर अत्याचार

Mumbai Crime News :

मुंबईतून एक धक्कादायक घटना समोर आली आहे. सोशल मीडियावरील मैत्री एका १५ वर्षीय नेपाळी मुलीला महागात पडली आहे. सोशल मीडियावरील मैत्रीचा गैरफायदा घेऊन २२ वर्षीय तरुणाने अल्पवयीन मुलीचा अत्याचार केल्याची घटना घडली आहे. या प्रकरणी पोलिसांनी आरोपींना अटक केली आहे. (Latest Marathi News)

नेमकं काय घडलं?

एका महिन्यांपूर्वी २२ वर्षीय तरुणाची सोशल मीडियावर नेपाळमधील १५ वर्षीय मुलीची ओळख झाली. त्यांनी एकमेकांच्या मोबाईल नंबरची देवाण घेवाण केली. त्यानंतर दोघांनी चॅटिंग सुरु केली. या तरुणाने मुलीला लग्नाचे आश्वासन दिलं आहे. त्याने या मुलीला महाराष्ट्रात बोलावलं.

नेपाळमधील या मुलीने तिच्या या मैत्रीविषयी कुटुंबातील सदस्यांना माहिती दिली नाही. या तरुणाने मुलीला धमकी दिली की, तू महाराष्ट्रात नाही आली, तर मी जीवन संपवेल. त्यानंतर मुलीने एकट्याने मुंबईच्या दिशेने प्रवास करण्यास सुरुवात केली.

पोलिसांच्या माहितीनुसार, नेपाळमधील मुलगी ही नेपाळवरून बसने १७ मार्चला उत्तर प्रदेशच्या गोरखपूरला पोहोचली. त्यानंतर गोरखपूरवरून ही तरुणी ट्रेनने १९ मार्चला कल्याणला पोहोचली. त्यानंतर आरोपीची पीडित मुलीसोबत कल्याण रेल्वे स्टेशनला भेट झाली. त्यानंतर या तरुणाने तिला रिक्षाने मुंब्रा येथील भाडेतत्वावरील एका घरात नेलं. या घरात तरुणाने या मुलीवर अत्याचार केला. त्यानंतर या तरुणाने मुलीला दिवा स्टेशनला सोडलं. (Mumbai Crime News)

पीडित मुलगी दिव्यावरून दादरला पोहोचली. या प्रवासादरम्यान, प्रवासी व्यक्तीला तिच्यासोबत विपरीत झाल्याचे कळाले. या व्यक्तीने पीडितेला सार्वजनिक रुग्णालयात दाखल केलं.

आरोपीने पीडित मुलीचा मोबाईल हिसकावून घेतला. मात्र, या मुलीला तिचा नंबर लक्षात होता. यामुळे पोलिसांनी मोबाईल ट्रेस करून आरोपीच्या मुसक्या आवळल्या. पोलिसांनी या आरोपीवर विविध कलमान्वये गुन्हा दाखल केला आहे.

दरम्यान, आरोपी तरुण वडाळ्याचा असून त्याने पीडित मुलीच्या मोबाईलमधील सर्व चॅट डिलीट केले आहेत. हे प्रकरणी मुंब्रा पोलिसांकडे वळविण्यात आलं आहे.