Kolhapur Crime: रेकॉर्डवरील गुन्हेगारांची दादागिरी! हात पाय बांधून तरुणांना बेदम मारहाण; ७ जणांवर गुन्हा दाखल

रणजित माजगावकर| कोल्हापूर, ता. २८ जून २०२४

कोल्हापूरच्या इचलकरंजीमध्ये रेकॉर्डवरील गुन्हेगारांनी चार मुलांना अमानुष मारहाण केल्याची धक्कादायक घटना समोर आली आहे. मोक्यातून सुटलेला रेकॉर्डवरील गुन्हेगार श्याम लाखे आणि त्याच्या काही सहकाऱ्यांकडून ही मारहाण झाल्याचे समोर आले आहे. या धक्कादायक घटनेचा व्हिडिओ सध्या सोशल मीडियावर व्हायरल होत आहे.

राज्यात गेल्या काही दिवसांपासून हत्या, मारामारीचे सत्र सुरू आहे. दोन दिवसांपूर्वी पुण्यामध्ये एक महिला आणि काही तरुणांना अज्ञातस्थळी नेत बेदम मारहाण केल्याची घटना समोर आली होती. हे प्रकरण ताजे असतानाच इचलकरंजीमध्ये रेकॉर्डवरील सराईत गुन्हेगारांकडून चार तरुणांना बेदम मारहाण करण्यात आल्याने खळबळ उडाली आहे.

हात पाय बांधून एका बंद खोलीत या मुलांना बेदम मारहाण करण्यात आल्याचे व्हिडिओ सध्या समोर आले आहेत. मोक्याच्या गुन्ह्यातून सुटलेला गुन्हेगार श्याम लाखे आणि त्याच्या साथीदारांकडून ही मारहाण करण्यात आली आहे. तरुणाचे पाय बांधून चौघांच्या मदतीने श्याम लाखे हा लोखंडी पाईपने मारहाण करताना दिसत आहे.

धक्कादायक म्हणजे आपली दहशत कायम राहावी यासाठी व्हिडिओ व्हायरल केल्याचेही तपासात समोर आले आहे. या घटनेने सर्वत्र संताप व्यक्त केला जात आहे. या मारहाण प्रकरणी सात जणांवर गुन्हा दाखल करण्यात आला आहे. पोलीस या प्रकरणाचा अधिक तपास करत आहेत.