Pune news: पुण्यात पुन्हा बिश्नोई गँगची दहशत? व्यापाऱ्याला थेट २ कोटींची खंडणी मागत जीवे मारण्याची गंभीर धमकी

पुण्यात बिश्नोई गँगच्या नावाने व्यापाऱ्यांना खंडणीसाठी धमकावण्याचे प्रकार थांबण्याचं नाव घेत नाहीयेत. गेल्या एका आठवड्यात अशा प्रकारची तिसरी घटना समोर आली असून, यावेळी उत्तम नगर परिसरातील एका बड्या व्यापाऱ्याला तब्बल २ कोटी रुपयांची खंडणी मागण्यात आल्याची माहिती समोर आलीये. या प्रकरणामुळे व्यापारी वर्गात भीतीचं वातावरण निर्माण झालंय.

मिळालेल्या माहितीनुसार, शनिवारी सकाळी संबंधित व्यापाऱ्याला इंटरनेट कॉलद्वारे धमकीचा फोन आला. फोन करणाऱ्या व्यक्तीने स्वतःची ओळख शुभम लोणकर अशी करून दिली. तक्रारदार हे उत्तमनगर-शिवणे मर्चंट्स असोसिएशनचे पदाधिकारी असल्याचं सांगत त्यांच्या बांधकाम व्यवसायाची, कारच्या नोंदणी क्रमांकाची तसंच त्यांच्या रोजच्या हालचालींची संपूर्ण माहिती असल्याचा दावा त्याने केला.

जीवे मारण्याची दिली धमकी

याचवेळी त्या व्यक्तीने व्यापाऱ्याच्या कुटुंबातील सदस्यांबद्दलही माहिती असल्याचं सांगितलं. "स्वतःची काळजी घ्या," असा इशारा देत त्याने जीवे मारण्याची धमकी दिली. त्यानंतर २ कोटी रुपये तयार ठेवण्यास सांगितले आणि पुढील सूचना लवकरच दिल्या जातील, असंही बजावलं.

या धमकीनंतर व्यापाऱ्याने तातडीने उत्तमनगर पोलीस ठाण्यात धाव घेत तक्रार दाखल केली. पोलिसांनी या प्रकरणी गुन्हा नोंदवून तपास सुरू केला आहे.

खंडणी मागण्याची तिसरी घटना

गेल्या आठवड्यात पुण्यात बिश्नोई गँगच्या नावाने खंडणी मागण्याची ही तिसरी घटना आहे. यापूर्वी २२ जून रोजी वानवडी परिसरातील एका स्टील उद्योगपतीकडे ५० कोटी रुपयांची खंडणी मागण्यात आली होती. त्यानंतर मांतरवाडी इथल्या त्यांच्या कारखान्यावर गोळीबार झाल्याची घटनाही घडली होती.

त्यानंतर २३ जून रोजी वडकीमधील एका औषध घाऊक विक्रेत्याकडे २ कोटी रुपयांची खंडणी मागण्यात आली होती. आता पुन्हा उत्तम नगरमधील व्यापाऱ्याला धमकी मिळाल्याने शहरातील व्यापारी वर्गात चिंता वाढली असून, या सलग घटनांमुळे पोलिसांसमोर मोठं आव्हान उभं राहिलंय.