Crime: लग्न मोडल्याचा सूड, तरुणाने मामाच्या १ वर्षांच्या बाळाचं अपहरण केलं; नंतर...

• लग्न मोडल्याच्या रागातून मामाच्या बाळाचे अपहरण

• कुर्ल्यातून एक वर्षाच्या बाळाचे अपहरण

• बाळाला डोंबिवलीत एका रिक्षात सोडून आरोपी फरार

• सीसीटीव्हीच्या मदतीने बाळ सापडले

संघर्ष गांगुर्डे, डोंबिवली

डोंबिवलीमध्ये नात्याला काळीमा फासणारी एक धक्कादायक घटना घडली. मामाने लग्नाला विरोध करून सोयरिक मोडल्याच्या राग डोक्यात गेला. एका मूकबधिर भाच्याने मामाच्या अवघ्या एक वर्षाच्या बाळाचे अपहरण केल्याची घटना उघडकीस आली. कुर्ल्यातून पळवून नेलेल्या या चिमुकल्याला डोंबिवलीतील एका बंद रिक्षात सोडून आरोपी फरार झाला. मात्र पोलिसांच्या सतर्कतेमुळे बाळ सुरक्षित सापडले असून आरोपीचा शोध सुरू आहे.

मिळालेल्या माहितीनुसार, मुंबईतील कुर्ला परिसरातून एक वर्षाचे बाळ अचानक बेपत्ता झाले. त्यामुळे बाळाचे आई-वडील चिंतेत आले. त्यांनी बराच वेळ बाळाचा शोध घेतला पण ते सापडलं नाही. त्यामुळे बाळाचे वडील श्यामसुंदर कांबळे यांनी पोलिस ठाण्यात धाव घेत तक्रार दाखल केली. पोलिसांनी तातडीने तपास सुरू केला.

१५० हून अधिक सीसीटीव्ही फुटेजची पडताळणी केल्यानंतर बाळाला घेऊन जाणारा तरुण पोलिसांना दिसला. हा तरुण श्यामसुंदर कांबळे यांचा मूकबधिर भाचा अमन सकट असल्याचे समोर आले. लग्नाला विरोध करून सोयरिक मोडल्याच्या रागातून अमनने मामाला धडा शिकवण्यासाठी त्याच्या एक वर्षाच्या मुलाचे अपहरण केल्याचा आरोप आहे. अपहरणानंतर त्याने चिमुकल्याला डोंबिवलीतील कोपर परिसरातील एका बंद रिक्षात सोडून पलायन केले.

डोंबिवलीच्या विष्णूनगर पोलिसांना हे बाळ सुरक्षित अवस्थेत आढळून आले. बाळाचा फोटो सोशल मीडियावर व्हायरल होताच कुर्ल्यातील अपहरण प्रकरणाचा उलगडा झाला. सध्या बाळावर शास्त्रीनगर रुग्णालयात उपचार सुरू असून आरोपी अमन सकटचा पोलिसांकडून कसून शोध घेतला जात आहे.