Crime News: पत्नीनेच दिली पतीच्या हत्येची सुपारी.. प्रियकराच्या मदतीने काढला काटा; ४ जण अटकेत

रामू ढाकणे, छत्रपती संभाजीनगर|ता. ६ मे २०२४

पत्नीनेच पतीच्या हत्येची सुपारी देत निर्घृण खून केल्याची धक्कादायक घटना छत्रपती संभाजीनगर शहरातून समोर आली आहे. या प्रकरणाचा पोलिसांनी अवघ्या २४ तासात उलगडा केला असून पत्नीसह ४ आरोपींना अटक करण्यात आली आहे. या धक्कादायक घटनेने परिसरात एकच खळबळ उडाली आहे.

याबाबत सविस्तर माहिती अशी की, छत्रपती संभाजीनगर शहरातल्या हडको परिसरात असलेल्या स्केटिंग ग्राउंडवर काल सकाळी गणेश दराखे या व्यक्तीचा धारदार शस्त्राने भोसकुन खून करण्यात आल्याची घटना घडली होती. सिडको पोलिसांनी आणि गुन्हे शाखेच्या पथकाने 24 तासात या खुनाचा उलगडा केलाय.या मध्ये आरोपी पत्नीसह इतर 4 जणांना पोलिसांनी अटक केली आहे.

विशेष म्हणजे पतीचा खून झाल्यानंतर तक्रार देण्यासाठी पत्नी समोर येत नसल्याने पोलिसांना संशय आला. त्यानंतर पोलिसांनी खाक्या दाखवताच पत्नीने खुनाची कबुली दिली. रूपाली गणेश दराखे असे सुपारी देण्याऱ्या पत्नीचे नाव असून सुपडू गायकवाड असे या मारेकरी प्रियकराचे नाव आहे. रूपालीने 2 लाख रुपयात नवऱ्याचा काटा काढण्याची सुपारी दिल्याची माहिती पोलीस तपास समोर आली आहे.

दरम्यान या प्रकरणी अमोल चिंतामण चौधरी, अजय दिलीप हिवाळे आणि अनिकेत चौथे यांना सिडको पोलिसांनी अटक करत त्यांच्याविरोधात पोलीस ठाण्यात खुनाचा गुन्हा दाखल केला आहे, याबाबत अधिक माहिती आज पोलीस उपायुक्त नवनीत कावत यांनी दिली आहे.