Pune Chain Snatching : वडापावचा मोह पडला सोन्याच्या भावात; महिलेचं पाच लाखांचं सोनं लंपास

वडापाव कोणाला आवडत नाही...अगदी चिमुरड्यांपासून ते वृद्धांपर्यंत सर्वचजण मिटक्या मारत वडापाव खातात. त्यातही प्रत्येक शहरातील वडापावची चव वेगळी. आता पुण्यातील हडपसर भागात हाच वडापावचा मोह एका वृद्ध दांम्पत्याला मोठा महागात पडलाय. अगदी सोन्याचा भावात.दचकलात ना. हो पण हे खरं आहे. निवृत्ती शिक्षिकेबाबत हा प्रकार घडलाय. त्याचं झालं असं की.

जयश्री धामणे पतीसमवेत बँक ऑफ इंडिया मध्ये तारण ठेवलेले सोन्याचे दागिने सोडण्यासाठी उऱळीकांचनच्या ब्रँचमध्ये गेल्या होत्या. स्कुटीवरुन दागिने घेऊन घरी परतताना शेवाळवाडीतील रोहीत वडेवाले यांच्या दुकानासमोर वडापाव घेण्याचा मोह जयश्रींना झाला आणि इथेच घात झाला. या दाम्पत्यावर पाळत ठेवलेल्या चोरट्यानं डाव साधला.

जयश्री स्कुटी जवळ थांबल्या होत्या. सोन्याचे दागिने असलेली बॅग स्कुटीच्या समोर अडकवलेली होती. त्याचवेळी चोरट्याने जयश्री यांचे लक्ष विचलित करण्यासाठी तुमचे पैसे पडले आहेत असं सांगितलं. आणि क्षणात दागिने असलेली बॅग लंपास केली. ही घटना सीसीटीव्ही मध्ये कैद झाली आहे. चोरट्याला पकडण्याचं मोठ आव्हान पोलिसांसमोर आहे. गेल्या काही महिन्यांतील पुण्यातील गुन्ह्यांचं प्रमाण बघता पोलिसांचा धाक उरला नाही, असं चित्र आहे. वृद्ध नागरिकांना भर रस्त्यात लुटण्याचे प्रकार घडत आहेत. त्यामुळे नागरिकांनीही सजग राहणं गरजेचं आहे.