अमानवी! निर्भायावर सामूहिक बलात्कार; दगडाने डोकं ठेचलं आणि प्रायव्हेट पार्टमध्ये बॉटल टाकली, निर्घृण हत्या

दिल्लीतील निर्भया प्रकरणाची पुनरावृत्ती करून देणारी एक अत्यंत धक्कादायक आणि संतापजनक घटना छत्तीसगडमधील अंबिकापूर जिल्ह्यात घडली आहे. एका महिलेवर सामूहिक बलात्कार करून तिची अत्यंत क्रूरपणे हत्या करण्यात आल्याने संपूर्ण राज्यात खळबळ उडाली आहे. महामाया मंदिराच्या प्रवेशद्वाराजवळ असलेल्या फुटपाथवर या महिलेचा रक्ताने माखलेला मृतदेह आढळून आला.

नेमकी घटना काय?

मिळालेल्या माहितीनुसार, ३ एप्रिल रोजी सकाळी महामाया मंदिराच्या मुख्य प्रवेशद्वाराजवळ एका महिलेचा मृतदेह स्थानिक नागरिकांना दिसून आला. घटनेची भीषणता पाहून नागरिकांनी तात्काळ पोलिसांना कळवले. महिलेचा चेहरा दगडाने ठेचून तिची हत्या करण्यात आली. पोलिसांनी घटनेचे गांभीर्य ओळखून फॉरेन्सिक टीम आणि डॉग स्क्वॉडला घटनास्थळी पाचारण केले.

पोलिसांच्या प्राथमिक तपासात समोर आलेली माहिती अंगावर शहारे आणणारी आहे. आरोपींनी केवळ बलात्कार करूनच थांबले नाहीत, तर पीडीतेच्या गुप्तांगात पाण्याची बाटली घुसवून अमानुष छळ केला. त्यानंतर तिचे डोके दगडाने ठेचून तिला जागीच ठार मारले. या घटनेने परिसरात तीव्र संतापाची लाट पसरली असून नागरिकांनी या प्रकरणाची तुलना दिल्लीच्या 'निर्भया' प्रकरणाशी केली आहे.

घटनेची माहिती मिळताच पोलीस प्रशासनाने तपासाची चक्रे वेगाने फिरवली आहेत. यासंदर्भात पोलिसांनी सांगितले की आजूबाजूच्या परिसरातील सीसीटीव्ही फुटेज तपासले जात आहेत. पिडीतेची ओळख पटवण्याचे काम सुरू असून मृतदेह शवविच्छेदनासाठी पाठवण्यात आला आहे. आरोपींच्या शोधासाठी विशेष पथके तैनात करण्यात आली असून लवकरच नराधमांना बेड्या ठोकल्या जातील असे पोलिसांनी सांगितले.

या क्रूर कृत्यामुळे स्थानिक रहिवासी आणि महिलांमध्ये प्रचंड रोष पाहायला मिळत आहे. अशा नराधमांना समाजात स्थान नाही, त्यांना तात्काळ अटक करून फाशीची शिक्षाच झाली पाहिजे, अशी मागणी स्थानिकांनी लावून धरली आहे. मंदिरासारख्या पवित्र ठिकाणाजवळ घडलेल्या या प्रकारामुळे सुरक्षेचा प्रश्नही ऐरणीवर आला आहे. पोलीस या प्रकरणाचा पुढील तपास करत असून आरोपींना लवकरात लवकर पकडण्याचे आव्हान आता प्रशासनासमोर आहे.