Crime: बायकोचे अनैतिक संबंध असल्याचा संशय, डोक्यात सिलिंडर घालत नवऱ्याने जागीच संपवलं

Summary -

• दिल्लीत नवऱ्याने बायकोची हत्या केली

• बायकोवर सिलिंडरने हल्ला करण्यात आला

• अनैतिक संबंधाच्या संशयातून ही घटना घडली

• पोलिसांनी आरोपीला अटक केली

दिल्लीमध्ये नवऱ्याने बायकोची निर्घृण हत्या केल्याची धक्कादायक घटना घडली. अनैतिक संबंधाच्या संशयावरून नवऱ्याने बायकोच्या डोक्यावर गॅस सिलिंडरने हल्ला करत तिला जागीच संपवलं. ही घटना दिल्लीच्या पुल प्रहलादपुर भागात घडली. रविवारी रात्री साडेनऊ वाजताच्या सुमारास ही घटना घडली असून त्यामुळे दिल्ली हादरली. पीडित महिलेला दीड वर्षांची मुलगी आहे. या प्रकरणी पोलिसांनी आरोपीला अटक केली.

मिळालेल्या माहितीनुसार, नवरा-बायकोमध्ये गेल्या काही दिवसांपासून वाद सुरू होता. रविवारी रात्री दोघांमध्ये पुन्हा वाद झाला. वाद ऐवढा वाढला की रागाच्या भरात नवऱ्याने बायकोवर सिलिंडरच्या सहाय्याने हल्ला केला. या हल्ल्यात महिलेच्या डोक्याला गंभीर दुखापत झाली आणि तिच्या पाठीचा कणा तुटला. या हल्ल्यात गंभीर जखमी झालेल्या महिलेचा जास्त रक्तस्राव झाल्यामुळे जागीच मृत्यू झाला. आपल्या चिमुकल्या दीड वर्षांच्या मुलीचा देखील या व्यक्तीने विचार केला नाही. आईचा मृत्यू झाल्यामुळे चिमुकलीच्या डोक्यावरील आईचे छत्र हरपलं. तर बाप आता तुरूंगात गेला.

महिलेच्या ओरडण्याचा आवाज ऐकून शेजारच्यांनी घटनास्थळी धाव घेतली. दरवाजा आतून बंद होता. घरमालकाच्या मदतीने दरवाजा उघडण्यात आला. आतमधील दृश्य खूपच भयानक होती. महिला रक्ताच्या थारोळ्यात पडली होती. तर तिच्याजवळ रक्ताने माखलेला सिलिंडर होता. आरोपी त्याच्या दीड महिन्यांच्या मुलीला मांडीवर घेऊन बायकोच्या मृतदेहाजवळ बसला होता. पोलिसांनी आरोपीला अटक केली. तर त्याची दीड वर्षांची मुलगी आता शेजारच्यांकडे आहे. पोलिस महिलेच्या नातेवाईकांना संपर्क करत आहेत जेणेकरून ती मुलगी त्यांच्या ताब्यात देता येईल. या घटनेमुळे दिल्लीमध्ये खळबळ उडाली.