Lodha Amara Crime : फक्त २०० रुपयांसाठी जीव घेतला, कामगाराने डोक्यात हातोडा घालून मुकादमाला संपवलं; अंबरनाथमधील भयंकर घटना

अजय दुधाणे, अंबरनाथ|ता. १६ सप्टेंबर

Ambernath Crime News: मजुरी कमी दिल्याच्या रागातून मजुराने मुकादमाच्या डोक्यात हातोडा घालून त्याची हत्या केल्याची धक्कादायक घटना अंबरनाथमध्ये घडली आहे. सलीम याकूब शेख असे या हत्या केलेल्या मजुराचे नाव असून अब्दुल रेहमान असे मृत मुकादमाचे नाव आहे. या भयंकर घटनेने परिसरात एकच खळबळ उडाली आहे. याप्रकरणी शिवाजीनगर पोलिसांनी गुन्हा दाखल करत आरोपी मजुराला बेड्या ठोकल्या आहेत.

याबाबत सविस्तर माहिती अशी की, अंबरनाथ पूर्वेतील वडवली सेक्शनमध्ये एका इमारतीच्या पुनर्विकासाचे काम सुरू आहे. या बांधकामाचे कॉन्ट्रॅक्टर मुकादम अब्दुल रेहमान याने त्याच्या पश्चिम बंगालमधील गावाहून दोन मजूर कामासाठी आणले होते. हे नवे कामगार आणि मुकादम बांधकामाच्या ठिकाणीच एका गाळ्यात राहात होते. या मजुरांना रोजचे ९०० रुपये मजुरी देण्याचं त्याने कबूल केलं होतं, मात्र प्रत्यक्षात तो त्यांना दिवसाची ७०० रुपयेच मजुरी देत होता.

यावरुनच मुकादम आणि दोन कामगारांमध्ये वाद झाला. हा वाद इतका वाढला की सलीम याकूब शेख या मजुराने मुकादम अब्दुल रेहमान याच्या डोक्यात हातोडा घातला. यात गंभीर जखमी झालेल्या अब्दुल रेहमानचा मृत्यू झाला. याबाबतची माहिती मिळताच पोलीस उपायुक्तांसाह अधिकाऱ्यांनी घटनास्थळी धाव घेतली.

दरम्यान, याप्रकरणी शिवाजीनगर पोलीस ठाण्यात हत्येचा गुन्हा दाखल करण्यात आला असून आरोपी मजूर सलीम याकूब शेख याला पोलिसांनी अटक केली आहे. या घटनेचा सविस्तर तपास सुरू असल्याची माहिती वरिष्ठ पोलीस निरीक्षक अशोक भगत यांनी दिली आहे. या भयंकर घटनेने परिसरात एकच खळबळ उडाली आहे.