Kolhapur Crime News : काेल्हापुरात चोरट्यांची 'हाथ की सफाई', मंगल कार्यालयात अवघ्या दोन सेकंदात 35 तोळे सोन्यावर डल्ला

- रणजीत माजगावकर

Kolhapur News :

नातेवाईकाच्या स्वागत समारंभासाठी कोल्हापुरात आलेल्या बेळगाव (belgaum) मधील एका महिलेचे सुमारे 35 तोळे सोन्याचे अवघ्या दोन सेकंदात चोरट्याने लंपास केल्याची घटना उघड झाली आहे. चोरट्यांनी पाळत ठेवून चोरी केले असल्याचा संशय पोलिसांनी व्यक्त केला आहे. सीसीटीव्ही कॅमे-याच्या फुटेजवरुन पाेलिस तपास करीत आहेत. (Maharashtra News)

कोल्हापुरातील शिरोली नाका (shiroli naka) इथं एका मंगल कार्यालयात लग्नानिमित्त स्वागत समारंभ कार्यक्रम आयोजित करण्यात आला होता. या समारंभासाठी बेळगावचा केतन नंदेशवन, आई मीना व अन्य कुटुंबीय या समारंभाला आले होते.

रात्री दहा वाजण्याच्या सुमारास स्वागत समारंभात या कुटुंबाला फोटो काढण्यासाठी बोलावल्यानंतर केतन यांच्या आई मीना यांनी त्यांच्या पायाजवळ पर्स ठेवली आणि फोटो क्लिक व्हायच्या आतच अवघ्या 2 सेकंदात ही पर्स अज्ञात चोरट्याने लांबवली. फोटो काढून येताच हा प्रकार नंदेशवन यांच्या ध्यानात आला. यानंतर सर्वांनी शोधाशोध केली. पण उपयोग झाला नाही.

या पर्समध्ये सुमारे 35 तोळे दागिने, रोख रक्कम आणि मोबाईल होता. दरम्यान याबाबतची माहिती पोलिसांना देण्यात आली. पोलिसांनी आणि नातेवाईकांनी कार्यालयातील सीसीटीव्ही कॅमेऱ्यांमधून संशयितांचा शोध घेण्याचा प्रयत्न केला.

सीसीटीव्ही मध्ये चोरटा हा सूटबुटामध्ये येऊन चोरी करून गेल्याचे निदर्शनास येत आहे. दरम्यान चोरीला गेलेल्या मुद्देमालाची बाजारभावाप्रमाणे किंमत २४ लाख रुपये इतकी होत आहे. पोलिस रेकॉर्डवर १५ लाख ८० हजार रुपयांचा ऐवज लंपास झाल्याची नोंद करण्यात आली आहे.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

या चोरीची नोंद शाहूपुरी पोलिस ठाण्यात (shahupuri police station kolhapur) झाली आहे. पोलिस निरीक्षक अजय सिंदकर यांच्या मार्गदर्शनाखाली तपास सुरू करण्यात आला आहे.

Edited By : Siddharth Latkar